Siglir tar il cuntegn

Header

cuntegn

Engiadina San Murezzan Metter la basa per l'avegnir

A la radunanza generala dad oz duai vegnir elegì in nov cussegl administrativ che porta quietezza en la destinaziun.

L'ultim mez onn da la destinaziun turistica Engiadina San Murezzan SA è stà accumpagnà da blers virivaris. Al cumenzament steva la relaschada dal CEO Gerhard Walter. Finì ha tut cun in cas giuridic ed il cussegl administrativ ch'è sa retratg en globo.

A la radunanza generala dad oz venderdi ch'ha lieu mo grazia ad in permiss spezial duai vegnir mess la basa per l'avegnir. Numnadamain cun eleger in nov cussegl administrativ.

Bleras aspectativas ch'èn dentant sumegliantas

Las aspectativas envers il nov cussegl administrativ èn uschia per la hoteliera Ladina Jann, il president dal cussegl administrativ da las pendicularas da l'Engiadin'Ota (Engadin St. Moritz Mountains) Luis Wieser sco era per Martin Aebli, president communal da Puntraschigna e president da la conferenza da presidents da la Regiun Malögia cleras: il focus duai ir enavos sin la lavur e davent da las persunas e las emoziuns.

Martin Aebli, chavels curts grischs, chaischa, gilet e tschop
Legenda: Martin Aebli RTR, Dario Müller
Mes giavisch fiss ch'ins s'occupa uss puspè da la chaussa dal turissem e betg pli da las emoziuns.
Autur: Martin Aebli President communal Puntraschigna
Luis Wieser, chavels curts brin-alvs, chamischa cun quaderins, giacca.
Legenda: Luis Wieser RTR, Dario Müller
Tenor mai ston ins integrar las pendicularas e l'hotellaria en dumondas strategicas, tut tenor cun integrar els en l'acziunariat.
Autur: Luis Wieser President cussagl administrativ Engadin San Murezzan Mountains
Ladina Jann, chavels mezlungs brins, egliers, blusa cun muster fin nair-alv, tschop nair.
Legenda: Ladina Jann RTR, Dario Müller
Jau sper che la situaziun sa quietescha puspè, gist uss cun il coronavirus fiss quai tant pli impurtant.
Autur: Ladina Jann Directura Hotel Rosatsch Schlarigna

Per l'elecziun dal nov cussegl administrativ èn quatter nums enconuschents. Las pendicularas proponan a Marcel Bührer, l'uniun da commerzi a Kurt Bobst, las vischnancas a Felix Ehrat e l'hotellaria a Claudio Dietrich. Dietrich è il sulet che fa part dal cussegl administrativ actual. Vegnir elegidas duain 3 fin 5 persunas.

Tge è tut capità?

RTR actualitad 07:00

Artitgels legids il pli savens