-
Bild 1 von 5. Duas da las pli enconuschentas ed impurtantas ovras da Giovanni Segantini pendan gist a l'entrada da l'exposiziun en il Forum Paracelsus. Bildquelle: RTR, Riccarda Müller.
-
Bild 2 von 5. En il center da la halla da baiver penda la «Ave Maria tar la traversada», in dals purtrets ils pli enconuschents da Giovanni Segantini. Bildquelle: RTR, Riccarda Müller.
-
Bild 3 von 5. La curatura Mirella Carbone davant ils dus purtrets ils pli vegls da l'exposiziun. Bildquelle: RTR, Riccarda Müller.
-
Bild 4 von 5. Per l'exposiziun ha la halla da baiver stuì vegnir drizzada en nov, ils purtrets pendan per part vi da paraids che zuglian las fanestras. Bildquelle: RTR, Riccarda Müller.
-
Bild 5 von 5. Il Forum Paracelsus cuntegn la tschiffada da la funtauna da Maurizius ch'è 3'400 onns veglia e la halla da baiver. Bildquelle: RTR, Riccarda Müller.
L'ovra principala, il Triptichon da las alps è vegnì transportà en il museum d'art Masi a Lugano. Ina part da l'ovra vegn mussada a Stampa, in'autra a Son Gagl en il museum d'art. Intginas ovras impurtantas da Giovanni Segantini restan dentant a San Murezzan e vegnan mussadas a partir da sonda en il Forum Paracelsus.
Lieu adattà ma pauc ideal
Il Forum Paracelsus che cuntegn la tschiffada da la funtauna da Maurizius ch'è 3400 onns veglia e la halla da baiver famusa è adattà istoricamain fitg bain per in'exposiziun. Las cundiziuns climaticas, da segirezza e da glisch n'èn dentant insumma betg stadas idealas.
Per 65'000 francs ha la fundaziun perquai installà indrizs da segirezza, in stgaudament ed umidificaziun provisoric e zuglià tut las funtaunas da glisch natirala.
Las ovras che pendan qua tutgan tar las pli impurtantas dasper il Triptichon.
Tranter las 23 ovras èn la «Racolta da fain», la «Ave Maria tar la traversada» u era «Mezdi en las alps».
L'exposiziun dura enfin ils 15 da settember. Tranter ils 21 da settember ed ils 20 d'october datti lura ina segunda exposiziun en il Forum Paracelsus, lura cun ovras main enconuschentas. Ils 20 da december è lura la reavertura dal Museum Segantini.
Renovaziun per 2,8 milliuns francs
Oravant tut sto il sistem d'alarm vegnir renovà ed adattà a las novas prescripziuns. Ma era l'illuminaziun ed il sistem d'alarm da stizzar fieus vegnan adattads. En pli datti ina nova entrada da furniziun pli gronda, ina nova stanza da restauraziun ed in pitschen café.
Mintg’onn visitan radund 30’000 persunas il Museum Segantini a San Murezzan. Dasper ovras da Segantini chattan era auters artists ina plazza vi da las paraids dal museum che stat sut protecziun da monuments.
RR actualitad 06:00