2018 ha l'hotellaria Engiadin'Ota cumenzà il project «Wandervögel» per eruir il potenzial da sgols da charter cun aviuns pli gronds a Samedan. L'introducziun dal sgol d'arriv cun instruments per Samedan il 2019 ed ina emprova da pilot per sgols tranter Londra e Samedan il favrer 2020 han motivà l'hotellaria da sclerir en detagl sche sgols da charter regulars, cun aviuns da 70 plazs e dapli, fissan pussaivels.
Igl è dentant sa mussà che quel è strusch realisabel. Il pli grond obstachel è l'aura difficila ed il grond risico d'annullaziuns pervi da quella. L'enviern pudess mintga terz passagier esser pertutgads. Che l'armada svizra dovra il spazi da l'aria da glindesdi fin a venderdi, ed il standard bass da segirtad tar la controlla da passagiers ed aviuns èn dus ulteriurs motivs. Uschia na saja in pretsch da tickets da radund 1'000 francs, per in sgol da return davent d'ina metropola europeica, betg realistic – scriva l'hotellaria d'Engiadin'Ota en ina communicaziun.
Schanza per alternativas en il futur
Uss vegnan examinadas alternativas. Uschia pudess in «Hotel-Air Shuttle», cun temps da partenza flexibels ed aviuns pli pitschens esser ina varianta. Ina gronda influenza haja là, co la tecnologia d'aviuns d'electro e da carburant persistent sa sviluppeschia. Il mument hajan quels sgols anc in fitg grond fastiz da CO2 per passagier.
