Dapi blers onns datti l'occurrenza dal Snow Polo sin il Lai da San Murezzan la fin da schaner ed il White Turf il favrer. Mintga giada è l'organisaziun e la construcziun sin il glatsch ina gronda sfida e lascha suar ils responsabels. Quest onn datti pauca naiv ed ils ultims dis ed emnas sumeglian las temperaturas plitost a quellas da la primavaira che d’enviern.
I vul anc almain 7 cm
Grazia las fradaglias il november e principi da december sa haja sviluppà bler glatsch, uschia ch’il lai saja schelà cun ina vetta da var 17-20 centimeters naiv, di Markus Berweger, il directur da la See-Infra SA. Per pudair cumenzar cun las lavurs sin il glatsch, vul i però almain 27 centimeters. Tenor Markus Berweger dovri uss pia notgs cleras cun temperaturas bassas. El è da buna speranza che quellas vegnan ils proxims dis e perquai na vessan tenor el da crudar naginas occurrenzas planisadas en l’aua.
I dovra er naiv
Per che chavals e chavaltgants pon la fin finala er propi giugar lur turnier da polo, dovri ina buna pista da naiv. Tenor Markus Berweger, na saja quai però nagin problem. Gia l’onn passà hajan ins stuì far naiv artifiziala e quai haja funcziunà bain. Pia è tut la speranza dals responsabels sin ina sbassada da la temperatura.