Siglir tar il cuntegn

Header

video
Fine Fain, la nova exposiziun da Not Vital
Or da Telesguard dals 16.01.2023.
laschar ir. Durada: 4 minutas 15 Secundas.
cuntegn

Exposiziun d'art Fine fain en clavà, art per la cha

L’artist da renum Not Vital ha prendì il num da la galaria d’art «Stalla Madulain» per il pled, ed ha dà enavos a l’oriunda chasa da purs il scopo da pli baud. Numnadamain fain en clavà e resgim en stalla.

Not Vital giauda la libertad da nar ch’el ha sco artist da renum mundial. Perquai na fa quai betg star stut sch’ins visita la galaria Stalla Madulain che mussa dus bels tocs fain en clavà, ed amez è in grond spievel che dat l’illusiun d’in clavà anc bler pli grond. Quai ch'era tschientaners a la lunga il pli normal dal mund, vegn mess da l’artist engiadinais en tut in’autra perspectiva. Simpel ditg «fine fain» – il titel da si'exposiziun. In plaun pli aval, in mantun resgim en stalla – daco? «Perquai che resgim tutga en stalla», uschia la resposta fitg banala da l'artist engiadinais.

Fain en clavà e resgim en stalla èn plitost per la chasa sez, e betg per ils aspectaturs. In omagi al scopo oriund che quest bajetg ha gì ina gia. Ins ha bunamain il sentiment che la chasa surri puspè.
Autur: Not Vital artist

Da Rio a Madulain

Sper las installaziuns ha Not Vital era exponì novas ovras, creà bel ed aposta per, in ses pleds – pli fraida galaria dal mund. Tuttas cunquai sut il motto «fraid». Collaschas cun aluminium e silicon ch’el ha creà en ses nov domicil, a Rio de Janero en Brasilia. Ovras che duajan era dar in sentiment da survegnir fraid cun contemplar ellas. Ina sort «air conditioning» visual che ha gidà a l'artist da far pli agreabel il temps da lavur en las chaliras da la Brasilia.

Ils cusrins e galarists da la Stalla Madulain, Gian Tumasch Appenzeller e Chasper Linard Schmidlin, èn intgantads da las ideas da Not Vital. Era schi fiss forsa stà pli lucrativ ch’in artist vegnia plitost cun purtrets e sculpturas – il renum da Not Vital porta la giuvna galaria in grond pass enavant.

L’exposiziun «fine fain» da Not Vital cuzza anc fin ils 12 da mars.

Telesguard 17:40

Artitgels legids il pli savens