Var 50 expositurs ed exposituras han preschentà dadens e dador la halla polivalenta Promulins a Samedan lur mastergn. Quai per attrair la giuventetgna da las valladas dal sid dal chantun Grischun.
Mancanza da persunal
En las valladas sco l’Engiadin’Ota manca il persunal. Ed era emprendists ed emprendistas mancan pli e pli. L'emprima Fiutscher per las valladas dal sid duai uss dar cunterpais a questa sfida, ha ditg la presidenta dal comité d’organisaziun, Sandra Püntener:
Nus vulain porscher a la giuventetgna ed ad interessads da vegnir ed empruvar ora ils differents mastergns.
Per ils impressaris ed impressarias, di Püntener, èsi fitg impurtant da pudair sa mussar. E dad uschia vegnir visibel per la giuventetgna.
Scola industriala che cumbatta
La scola industriala è situada gist dasper l’exposiziun e cumbatta gia in bun temp cun la mancanza dad emprendistas ed emprendists. Tenor il manader da la scola, Gian Carlo Simonelli, han ins gì avant 10 onns gì mo 300 scolars e scolaras. Ozendi è la cifra dad emprendists ed emprendistas be pli sin circa 180.
Cun quai che nus n'avain betg pli uschè blers emprendists ed emprendistas, na pudain betg pli porscher scola per tut ils mastergns. E sch'in è davent da Samedan, èsi prest impussibel da purtar el enavos en la scola industriala.
Trais dis guardar, tutgar e duvrar
L’exposiziun Fiutscher duai dar la pussaivladad a la giuventetgna da betg mo vesair, mabain gist er empruvar las differentas professiuns. Ella duai animar e motivar giuvnas e giuvens da far in emprendissadi.