Da pudair sunar puspè sin in palc davant in public valia aur e saja per tut la band in giudiment, admetta il musicist Engiadinais, Pius Baumgartner. El che fa part al Festival da Jazz sco unica furmaziun indigena quest onn.
Igl è ina grond’onur da pudair sunar ad in festival da renum internaziunal sco il Festival da Jazz San Murezzan.
Ensemen cun Valeria Zangger, Res Coray, Jörg Gujan e Benno Bernet ha la furmaziun da Pius Baumgartner «Swing Avenue» intgantà il public cun classichers da la musica da jazz e swing. Quai sut tschiel avert, sin l’areal sper la riva dal Lai da San Murezzan, nua che la glieud ha pudì seser libramain sin giaschaditschs, e cuschins.
Emblidà è entant il temp insolit senza concerts ed engaschaments ils ultims mais. L’interrupziun da bunamain in onn, quella saja dentant stada fitg lunga per tut ils artists. Tuttina haja quel stop er fatg bain ad el.
L'emprim temp da la pandemia è stà per mai in surlevtg.
Il squitsch saja stà avant corona adina pli aut e l’agenda adina pli fullanada cun termins. Suenter ils emprims mais «pausa sfurzada», haja er el sperà, che quella fineschia bainbaud, uschia Pius Baumgartner. Ussa sa legra el da turnar puspè en il mund da musica, senza crudar puspè en ina rutina.
