L'emprim festival da Teater Travers va plaunsieu a fin. Las organisaturas ed ils organisaturs han quintà cun 400 fin 500 persunas, quai muntass salas circa 80% plainas. Gianna Olinda Cadonau haja dumbrà circa 400, uschia ch'ins possia esser cuntents.
Funcziunà bain haja cunzunt la diversitad dal program, quai sa mussia er en il dumber da visituras e visiturs. Vi da detagls sco planisar en pausas per il public per ir a mangiar possian ins anc lavurar, di Cadonau. Chaussas organisatoricas pia.
Sper las trais represchentaziun dal teater en il Globe dal Lyceum Alpinum a Zuoz, ha il festival envidà ad in lavuratori per scriver cun Felix Benesch, concerts da Ladunna ed Astrid Alexandre. Flurin Caviezel ha preschentà ses program «Fodas» ed ha la dumengia anc organisà in chant cuminaivel.
Motivaziun per cuntinuar
Il team da producziun dal festival saja motivà da cuntinuar, di Gianna Olinda Cadonau. Els ed ellas veglian vinavant s'occupar cun il teater contemporan rumantsch: Tge che quai veglia dir insumma, e tge ch'els veglian programmar vinavant.
L’onn 2022 han las trais instituziuns, la vischnanca da Zuoz, il Lyceum Alpinum e la Lia Rumantscha fundà l’Uniun Travers. Quai cun la finamira da promover il teater rumantsch. Ellas han creà da cuminanza il premi da teater «premi travers Zuoz» e lantschà il festival da teater.
Quel duai avair lieu mintga dus onns, cun in budget da 200'000 francs ensemen cun il teater. Durant trais dis datti represchentaziuns, prelecziuns scenicas, concerts ed ina premiera d'in teater rumantsch. Quest onn cun il toc «üna sbrinzla – üna grotesca otalpina» or da la plima da Selma Mahlknecht ch’ha gudagnà la concurrenza.
Promoziun da scriver dramatic rumantsch
Il teater ha ina lunga tradiziun en il Grischun. El ha sias ragischs en il teater popular che la Lia Rumantscha promova dapi il cumenzament. Ina funcziun impurtanta dal teater è la transmissiun da la lingua, quai ch’è il medem mument ina da las pitgas principalas da la promoziun dal rumantsch. Zuoz sco lieu central dal svilup dal rumantsch scrit è il dachasa cultural ideal, scriva l’Uniun Travers sin sia pagina d’internet.
