Siglir tar il cuntegn

Header

cuntegn

Film documentar da Quadroni Tribunal federal annullescha decisiun da la UBI

La critica ch'il film documentar da SRF, davart Adam Quadroni, ha fatg envers il president da la dretgira regiunala Engiadina, haja giugà ina rolla subordinada. A questa conclusiun vegn il Tribunal federal. Quel ha annullà ina decisiun da l'Autoritad independenta da recurs davart radio e televisiun.

La UBI aveva decidì la fin avust 2020 che SRF haja cuntrafatg al principi d'objectivitad cun crititgar il president da la dretgira regiunala Engiadina Bassa en il film documentar. Ella era vegnida a la conclusiun ch'il president na saja betg vegnì purtretà cun la diligenza necessaria.

Il Tribunal federal scriva uss en sia sentenzia, ch'ins avess bain pudì realisar il film «Der Preis der Aufrichtigkeit – Adam Quadronis Leben nach dem Baukartell» en in'autra moda u meglier en singuls puncts. Guardà sur l'entir film, na saja il principi d'objectivitad dentant betg vegnì violà. Perquai ha la dretgira approvà il recurs da SRF.

La UBI n'avess tenor il Tribunal federal gnanc gì dad intervegnir. Tenor ils derschaders a Losanna na possian las pretensiuns envers il principi d'objectivitad ed in rapportar a moda equilibrada betg esser uschè rigurusas, «che la libertad schurnalistica e spontanitad, ch'è necessaria per la societad democratica e pluralistica, va a perder».

«Aspect secundar»

En il focus èn stadas singulas sequenzas dal film, en las qualas il president da la dretgira regiunala da l'Engiadina Bassa era vegnì crititgà pervi da sia independenza e ch'el saja stà memia da strusch al cartel da construcziun en Grischun. Tar questas passaschas sa tractia dentant d'in aspect secundar da l'istorgia principala, che fetschia ora be paucas minutas dal film cun total radund 50 minutas lunghezza, scriva il Tribunal federal.

Per il public saja cleramain visibel ch'i vegnia mussà en il film in purtret ord vista da Quadroni. Quai neutraliseschia anc ina giada las renfatschas envers il president da la dretgira. Tuttina na possian renfatschas envers terzs betg simplamain vegnir surpigliads simplamain uschia. En quest cas haja la responsabla dentant empruvà da survegnir ina posiziun dal president – quai che saja er visibel en il film. Il president n'haja dentant betg respundì in mail da la redactura. Ed il principi d'objectivitad na chaschunia tenor il Tribunal federal betg, ch'ina contribuziun stoppia vegnir fatga dependenta da la prontadad e la veglia da terzs.

Gnanc gì il dretg da recurrer

Il recurs encunter il film da DOK aveva il vicepresident da la dretgira regiunala da l'Engiadina Bassa inoltrà e betg il president crititgà sez. En sasez n'avess la UBI gnanc pudì entrar sin il recurs, scriva il Tribunal federal.

Quel ch'haja recurrì, na vegnia gnanc menziunà en il film ed el na saja er uschiglio betg pertutgà en ina moda speziala, ch'avess pussibilità ad el da recurrer sco pertutgà. Ad el fiss stà avert il recurs popular, che sto vegnir suttascrit d'almain 20 persunas.

RTR novitads 14:00

Artitgels legids il pli savens

Scrollar a sanestra Scrollar a dretga