Il pretsch da l’ieli è dapi la guerra da l’Iran ì ad aut. Ina situaziun che procura per malsegirezzas tar commerziants e furniturs d’ieli ed ils clients. Gian-Andrea Conrad, il directur da la Conrad-Storz SA sto perquai actualmain esser adina sin il current a reguard il martgà.
La sfida en noss job è il management da ristg. En situaziuns dinamicas èsi impurtant da chattar il dretg mument per cumprar ieli.
Per il mument dettia il martgà in zic speranza. Numnadamain demussia la «backwardation» ch’il pretsch vegn puspè pli bass entaifer las proximas emnas. Far ina prognosa, quai è però sco dar in sguard en la culla da vaider. La situaziun po pia restar fitg volatila.
Clients cumpran tuttina
Tar las empustaziuns dals clients na badian el però betg uschè bler, sco il disponent Fabian Steck di. Sch’il tanc d’ieli è vit, han ils clients numnadamain be l’opziun d’avair fraid u d'empustar ieli.
