Turissem e cuntrada, quai èn ils dus secturs tematics ch’il plan directiv Engiadina Bassa/Val Müstair prevesa d’optimar. Cun l'adattaziun dal plan directiv han ins stgaffì las premissas per extender il territori da skis Scuol Motta Naluns in direcziun Val Laver. Percunter vegn diminui il territori da skis tranter il vitg Scuol e la staziun da muntogna.
Emprova dad optimaziun dubla – per Samignun e per la selvaschina
Er il territori da skis da Samignun duai vegnir optimà, quai en etappas. Planisada è l'extensiun dal territori da skis Ravaischer Salaas cun dus novs runals sco er ina colliaziun tranter Samignun Vitg ed il Salaaserkopf e Samignun Laret/Compatsch e Muller.
La dumonda, sche l'extensiun planisada periclitescha la selvaschina, è vegnida sclerida ed examinada detagliadamain en il rom d'ina expertisa biologica pertutgant la selvaschina. Sco mesira centrala vegn fixà in grond territori da paus per la selvaschina en il plan directiv regiunal.
Era colliaziun tranter ils dus territoris da skis en vista
Sco preorientaziun è vegnida integrada en il plan directiv regiunal er ina colliaziun dals territoris da skis tranter il territori Scuol Motta Naluns e Samignun/Ischgl. In project che è gia dapi blers onns sin maisa. Da questa preorientaziun ha la regenza prendì enconuschientscha senza vigur lianta per las autoritads chantunalas.
RR novitads 09:00