Gia dapi 50 onns han lieu las emnas da lingua e cultura a Samedan, dapi l’onn 2020 è quella purschida da la Fundaziun de Planta er a Segl. Tgi che sa participescha ad in da quels curs chatta bleras bellas invistas en la cultura rumantscha sco er ina instrucziun da lingua intensiva.
Quest onn sa participeschan 115 persunas als curs da rumantsch da la Chesa Planta Samedan. Il dumber è puspè sa remess suenter pli paucas scolaras e scolars suenter la pandemia, uschia la respunsabla per ils curs Martina Shuler-Fluor.
La pli gronda part dals participants als curs da rumantsch èn dunnas. La lingua e la cultura e surtut l'interess per quella para anc adina dad esser insatge feminin.
Investiziun en la lingua
Empe d'ina gronda festa da giubileum, ha la Fundaziun de Planta che organisescha ils curs investì ils raps en ina re-ediziun d'il med d'instrucziun «Rumauntsch cun schlauntsch». Ultra da quai è la purschida vegnida schlargiada cun ina plattafurma digitala. Fatg viva sin ils 50 onns curs da rumantsch putèr vegni tuttina. Quai en cumbinaziun cun las festivitads en occasiun da 80 onns Fundaziun de Planta a Samedan.
Il curs a Samedan porscha dapi l'emprima ediziun il fenadur dal 1973 in’introducziun en il diever linguistic da la Engiadin’Ota – puter. Quai a scrit ubain a bucca. Tgi che ha gia emprais in zic, lez po er approfundar la savida en quell’emna. Ma i na vegn betg be emprais en quella emna, i vegn era fatg spazi per chantar e per far excursiuns nunemblidaivlas.
Or da l'archiv:
