Cun pleds festivs, gratulaziuns da tuttas varts, in'exposizun speziala davart il puter, musica ed ina chanzun per il giubileum han ins festivà quella fin d'emna en Chesa Planta Samedan.
Center da cultura e lingua
La fundaziun de Planta Samedan festivescha quest onn il giubileum dad 80 onns. La Chesa Planta era blers onns in monument betg accessibel per la populaziun, il plaz oravant era serrà cun ina chadaina. Oz è quai auter; il plaz è accessibel e la porta imposanta envida d'entrar e sfundrar en il mund dal rumantsch puter ed il stgazi cultural da l'Engadin'Ota.
Chanzun per giubileum
Per il giubileum ha la musicista oriunda da La Punt Chamues-ch, Martina Linn scrit ina chanzun cun il titel «Nossa chesa». Cun quai ch'ella scriva normalmain musica per englais ha ella gì agid da la manadra da la Chesa Planta Martina Shuler-Fluour, che ha er motivà la musicista d'insumma chantar en puter. La chanzun ha gì premiera la sonda saira sin la plazza avant la Chesa planta. Quai ensemen cun autras musicistas rumantschas: Astrid Alexandre, Ursina Giger, Pascal Gamboni, Rees Coray e Samuel Bauer. La chanzun duai dar in maletg da la Chesa Planta e sia istorgia.
