Dapi l'onn 2013 creescha l'Uniun dals Grischs sin lur pagina d'internet ils dicziunaris per ils idioms puter e vallader. Cun sia lavur facultativa sco redactur haja Gion Tscharner prestà ina contribuziun considerabla per cuntanscher quest term impurtant. En la vegliadetgna dad 88 onns dettia el uss vinavant questa incumbensa. Quai scriva il Departament d’educaziun, cultura e protecziun da l’ambient dal Grischun.
In iniziant principal per ils dicziunaris
Gion Tscharner è stà in dals iniziants principals per ils dicziunaris da puter e vallader ed è s'occupà da quels sco redactur dapi l'entschatta. L'emprim aveva il dicziunari puter radund 83'000 pleds ed il vallader 96'000 pleds. Suenter millis e millis uras da lavur voluntaras da Gion Tscharner ha la banca da datas oz radund 100'000 pleds puters e bunamain 150'000 pleds valladers. Plinavant haja el era respundì a blers e-mails da persunas, ch'hajan gì ulteriuras dumondas.
L'Uniun dals Grischs ha pudì surpigliar ils dretgs vi dals dicziunaris vallader e puter da Gion Tscharner e tschertga ina successura u in successur.
