Hobi cun success - In chapè per «in di da schnuz»

Dapi passa dus onns producescha Tanja Wüthrich da Puntraschigna chapels en tut las colurs ch'èn ornads cun in pled u ina frasa per puter. Quest hobi ha procurà che passa 500 tals chapels rumantschs han gia chattà lur via da l'Engiadina en tut la Svizra.

Per quest december dat la designra da Puntraschigna anc ora ina nova collecziun cun chapels – e nov era chapitschas per l'enviern.

«Jau n'hai insumma betg gugent paraplievgias, per esser sincera als odiesch jau. Quels guaffens emblid'ins per il pli en in lieu ed ins na sa mai propi nua als deponer. E betg darar rumpan paraplievgias svelt», di Tanja Wüthrich. Perquai ha ella gia adina pront in chapè u insatge auter per cuvrir ses chau e quai per tut las auras pussaivlas.

Sia passiun per chapels na sa restrenscha però betg mo sin sia atgna gardaroba, Tanja Wüthrich producescha dapi dus onns chapels ch'ins inscuntra adina puspè sin ils chaus da persunas en l'Engiadina. Il spezial vi da quels è ch'els èn ornads cun in pled u cun ina pitschna frasa per puter.

6 onns al Lai dals Quatter Chantuns

Tanja Wüthrich è creschida si a Puntraschigna, però cun geniturs oriundamain dal chantun da Berna. A chasa è adina vegnì discurrì tudestg, e rumantsch ha Tanja Wüthrich lura emprendì en scola. Plaschair vi dal rumantsch haja ella però adina gia gì. Durant ses onns da scola a l'Institut Otalpin a Ftan è ella era vegnida en contact cun il Vallader. Da quel temp ha ella collegas, cun ils quals ella discurra anc oz rumantsch. Suenter la matura spezialisada a Schiers ha ella frequentà la scola d'hotellaria a Thun. Quella ha manà ella a la fin en l'Hotel Vitznauerhof al Lai dals Quatter Chantuns. Là ha ella passentà sis onns e per la gronda part dal temp sco vicedirectura a l'hotel da quatter stailas.

In hobi cun success

«L'idea per il project cun ils chapels hai jau gì avant dus onns, cura che jau hai gidà a construir in concept store per l'Hotel Maistra 163 a Puntraschigna. Là sun jau turnada en l'Engiadina e là avevan nus era chapels en l'assortiment, però cun il messadi ‹From Zurich with Love›», sa regorda Tanja Wüthrich. Quai saja a la fin stà il punct da partenza per ella da cumenzar a producir chapels en atgna reschia, però cun in messadi per puter. Quels venda Tanja Wüthrich sut ses label «Simone». Quai sa tracta dal rest da ses segund prenum, che po tenor ella esser in num d'ina dunna u d'in um. Cun la tscherna da quest num vul ella era mussar che ses products èn per tuts dus genders, pia chapels unisex.

Il label è però anc adina «mo» in da blers hobis da Tanja Wüthrich. Ella lavura numnadamain anc en in pensum dad 80 % tar San Murezzan Turissem sco manadra da la sparta «Guest Relations». E sper crear chapels passenta la designra ses temp liber sco fotografa passiunada – ed ella ha era scuvert in interess per lavurs en arschiglia.

Gia vendì passa 500 chapels

Ils chapels da Tanja Wüthrich datti per il mument en 11 variaziuns, p.ex. cun ils pleds «allegra», «vin, sulegl e ti» u cun il messadi «in di da schnuz». Sco emprim n'haja la designra betg pensà che ses chapels pudessan avair grond success, surtut betg tar turists che n'enclegian betg rumantsch. «Però gist als emprims martgads da Laret a Puntraschigna hai jau pudì vender divers chapels. Gist quel cun il pled ‹pacific› è vegnì stimà fitg, era dals esters», di Tanja Wüthrich. Ella agiunta che quai haja fatg grond plaschair ad ella da vesair ch'ils turists prendan cun sai insatge da l'Engiadina e quai anc cun in pled rumantsch.

En consequenza ha er il concept store «Murezzan» da Valentina Motti e Claudio Pittin a San Murezzan Bogn prendì ils chapels da Tanja Wüthrich en l'assortiment. Ensemen cun ses onlineshop ha ella gia vendì passa 500 chapels durant ils ultims dus onns.

Chattar l'inspiraziun en il dicziunari «Buonder cun cornas»

L'inspiraziun linguistica per ses products survegn Tanja Wüthrich cun sfegliar en il «Buonder cun cornas» – in dicziunari ladin-tudestg. «Jau vegn simplamain en tschertga da pleds che tunan divertent u interessant ed emprov da cumbinar els. Quai stuess a la fin esser umor per il mintgadi, e betg adina manegià dal tut serius», di Tanja Wüthrich. Adina sch'ella ha in pèr ideas, las preschenta ella ad ina amia ch'è magistra primara. Quella la cusseglia lura, sche las creaziuns funcziuneschan u betg.

Sco che la designra raquinta, ha ella anc ina lunga glista cun novs versins e pleds. E da quella glista èn arrivads in pèr chavazzins sin novs products per la nova collecziun da chapels da «Simone». Quella vegn publitgada quest december e cuntegna sper chapels era chapitschas en il medem design. Tranter auter datti en l'avegnir er il chapè cun ils pleds «senza cunfins».

E senza cunfins paran era las ideas per l'avegnir da ses label da moda, però Tanja Wüthrich sa vul laschar temp per quest project: «Quai sto crescher plaun e saun, era siond che quai è per il mument anc in hobi. Ma d'avair il success cun mes chapels puters – e manar uschia in pau buna luna en il mintgadi – quai ma fa grond plaschair e motivescha da realisar ulteriuras ideas. Da quellas hai jau bleras.»