Ch'i saja bainquant en moviment, è scrit en in «petit communiqué» sin la pagina d'internet da l'Hotel Linard a Lavin publitgà il november. «Ma nus spetgain cun pazienza d'infurmar concretamain», vegn lura anc agiunt en quella pitschna communicaziun.
E Hans Schmid, manader da gestiun da l'hotel e president da la Pro Linard SA che posseda l'immobiglia, na vul sin dumonda anc betg tradir dapli davart il process da successiun: «Jau na less betg far l'orachel. Ma nus ans engaschain fermamain per ch'i dettia ina successiun, suenter noss engaschament.»
Inspiraziun viennaisa per la stagiun d'enviern
Ussa al principi da december èn passads ils «otto mesi» che Hans Schmid aveva annunzià questa primavaira sco cumià suenter 19 onns en l'Hotel Linard – la derniera numnada uschia perquai che l'hotel era vegnì avert anc ina ultima giada per otg mais.
Ma al cumià suonda anc in epilog: Durant l'enviern daventa l'Hotel Linard il «Café Bazzi» – ina chasa da café a la viennaisa. «Quella idea na sa basa betg mo sin mia passiun per Vienna», di Hans Schmid, «ma ha er ina dimensiun seriusa en vista a la dumonda, tge che pudess esser in concept che porta per questa chasa.» Ch'ins possia er en il Café Bazzi far tschaina, di Hans Schmid, «simplamain pli simpel che avant». Ed empè da reservar ina maisa per sai as sesa lura vi d'ina da las grondas maisas cuminaivlas ch'els han entant mess ad ir en la sala dal restaurant.
Ma era sche l'Hotel Linard sa transmida per l'enviern en in café viennais, pernottar pon ins là tuttina anc. «Las stanzas restan part da la purschida. Cun l'idea dal ‹Café Bazzi› pudain nus balantschar auter ils basegns dals giasts e las structuras da la gestiun», di Hans Schmid. «Uschia pudain nus offrir ina purschida che na pretenda betg tant persunal sco quella d'in hotel convenziunal.»
Iniziativa Lavin: mo anc ina regurdanza
Co enavant cun l'Hotel Linard, ma er cun la Chasa Bastiann e cun l'anteriur Hotel Crusch Alba, las duas autras chasas en possess d'interpresas da Hans Schmid? Quella dumonda aveva fatg en zercladur da quest onn era l'Iniziativa Lavin, ina societad ch'è s'engaschada per spazi da viver e per il svilup dal vitg.
«Sch'ins na fa nagut, lura capita la midada da dadora. Ma sch'ins vegn sez activ, pon ins er influenzar quella midada.» Quai aveva ditg quella giada Jason Studerus envers la FMR en connex cun l'annunzia ch'i vegnia tschertgada ina successiun per l'Hotel Linard. El era suprastant da l'Iniziativa Lavin ed aveva ensemen cun Jasmin Hauser, Nils Wohlwend e Tobias Schwarz envidà ad ina saira da dialog en la sala da gimnastica.
Var 30 abitantas ed abitants eran suandads a quest invit per tschertgar ensemen ideas e propostas per revitalisar il vitg – ed explicitamain er areguard las chasas ch'èn scrittas ora. Quella giada era era vegnida articulada l'idea da fundar ina cooperativa per lura cumprar l'hotel u forsa era tut las trais chasas. Capità n'è dentant betg pli bler.
Societad senza suprastanza funcziunala
Entant abita dals quatter suprastants da l'Iniziativa Lavin mo pli Tobias Schwarz a Lavin. Ils auters trais han bandunà il vitg ed era la suprastanza da la societad. La pagina d'internet da l'Iniziativa Lavin n'exista betg pli. Vi da l'idea da prender il destin dal vitg en agens mauns, regorda entant mo pli la pagina d'internet da Jason Studerus. Là vegn preschentada l'Iniziativa Lavin sco referenza da sia lavur e descritta sco «project che mussa, co che preschentaziun, lingua e strategia rinforzeschan l'identitad locala e fan daventar palpabel in narrativ».
«L'Iniziativa Lavin n'è per il mument betg pli operativa», di Tobias Schwarz sin dumonda. «Cun quai che jau sun ussa sulet en suprastanza n'ademplescha la societad betg pli ils agens statuts. Nus faschain la fin da l'onn ina radunanza generala per dumandar sche insatgi auter fiss pront d'entrar en la suprastanza. Sche na, na resta nagut auter che da schliar la societad.»
Ina funcziun da «service public»
Ma tgi auter pudess lura surpigliar la gestiun da l'Hotel Linard e forsa gist era la Chasa Bastiann ed il vegl Hotel Crusch Alba? «I sto esser insatgi che po garantir persistenza», di Hans Schmid, «insatgi che n'ha betg mo il flad per dus onns e lura sa mussa ch'i n'era betg dapli che manegià bain.» Tenor l'hotelier surpiglian pitschnas ustarias e pitschens hotels sco il Linard er ina funcziun da «service public».
«Quels furman il provediment turistic da basa, procuran per vitalitad en il vitg e per l'attractivitad da la regiun. Ma purschidas da ‹service public› n'èn betg per se rendablas e na portan betg sezzas.» Ch'i fetschia basegn era d'idealissem e che ils interessents sajan pronts da gidar a purtar en moda substanziala la gestiun.
Il fanadur ha Hans Schmid descrit en la publicaziun da vendita tge che quai pretenda: «Preferì è la surdada da la gestiun ad impressaris, mecens u fundaziuns.» Proponì vegn en la publicaziun in «share-deal», la vendita da las participaziuns vi da la Pro Linard SA cun tut las valurs da facultad e tut las obligaziuns, betg la vendita mo da l'immobiglia che ha tenor stimaziun uffiziala ina valur actuala da strusch 5,2 milliuns francs.
Chattar ina successiun fin primavaira
In'instituziun che ha envers la FMR confermà d'esser en in barat per segirar l'existenza da l'edifizi è la Fundaziun Edith Maryon da Basilea. Quella s'engascha per retrair immobiglias da la speculaziun per lura pussibilitar in'utilisaziun raschunaivla ord vista sociala.
«Premissa per segirar in'immobiglia è ch'i vegnan ensemen avunda donaziuns», scriva Ulrich Kriese da la Fundaziun Edith Maryon sin dumonda, «entant n'è quai dentant anc betg il cas.» Che l'Hotel Linard saja ina localitad bellischma, en la quala i vegnia fatg lavur culturala preziusa, agiunta el anc. «Nus beneventassan sch'i gartegiass da mantegnair quai era per il futur.»
Hans Schmid da sia vart ha scrit en il «petit communiqué» ch'igl haja dà discurs cun var ina dunsaina d'interessents concrets. «Entant ch'ils ins approfundeschan variantas e participaziuns, han auters puspè prendì distanza», scriva el enavant. E di lura anc: «Quels ch'èn anc interessads han propi grond interess.» L'intenziun resta da chattar fin da primavaira ina successiun.