Istorgias persunalas - La glieud da Scuol Ost raquinta

Intervista cun Sara Fanchi

Jolanda Zürcher 48

Igl è bunmartgà da viver a Runà, en las abitaziuns èn blers uffants ed il lieu è insumma ideal per viver e star patgific. Quai di Jolanda Zürcher ch’è da chasa dapi dus onns en ina da las 30 abitaziuns dal bloc a Runà.

Er Annatina Alini, ina dunna pensiunada abita dapi in onn en il bloc Runà. Igl è in bajetg cun 30 abitaziuns cun bleras famiglias. L’edifizi sa chatta a l’ur dal quartier Scuol Ost.

Il motiv ch'Annatina Alini ha fatg midada a Runà è ch’ella abitava gia durant sia uffanza en il medem lieu. La dunna pensiunada saja stada cuntenta d’avair chattà in lieu per abitar ch’è er pajabel. Ultra da quai giauda ella er il contact cun ils vischinants e las vischinantas en chasa. Ils ultims onns saja adina puspè vegnì renovà en chasa. Tranter auter cun in ascensur. 

Adrian Stecher 69

L’interpresa a Manaröl che ses bab aveva fundà l'onn 1950, han Adrian e ses frar Heini Stecher surpiglià. Entant vegn la firma manada en terza generaziun, in affar da sanitar e cuvratetgs cun radund 20 collavuraturs e collavuraturas. Al cumenzament eran els be en paucs a Manaröl en la zona da mastergn. Entant èn domiciliadas 15 firmas sin quel areal cun radund 100 collavuraturs.

Annina Mengiardi 72

La magistra d’economia pensiunada abita ad Ardez. Ella vegnia adina puspè a Scuol per far cumissiuns. Dal svilup dal quartier Scuol Ost haja ella plaschair. Grazia a quel dettia puspè dapli famiglias e blers uffants en vischnanca.

Erica Franziscus-Andri cun ses figl Andri

Ella vegn adina puspè numnada “la mamma dal quartier” – quai haja tut tenor da far cul fatg che Erica Franziscus è cusunza e cumada adina puspè vestgadira dals da Scuol. Dapi 35 onns viva la dunna oriunda da la Val Müstair a Scuol, dapi il 2001 è ella da chasa en il quartier Scuol ost.

Jolanda Thanei 66

Ella s’è inamurada cun 18 onns en l’Engiadina, la lingua e las muntognas. Suenter avair abità er durant 20 onns en la Val Müstair, è sia famiglia turnada en Engiadina. L’emprim a Sent ed uss a Scuol. Oriunda è ella dal chantun Basilea.

Scuol Ost ha giavischà al radio

Ils abitants e las abitantas da la part da Scuol vers l’ost han giavischà musica e salidà durant in'ura.

Vitiers èn ier sis mattas da Scuol vegnidas a chantar per lura magistra: Maja, Lily, Alissa, Naya, Fabiana e Sina.

Gian Luigi Castelazzi

Dapi 35 onns lavura Castelazzi en il quartier. En l'interpresa ch'el maina, Crüzer SA, vegn ensemen vaider, palpiri e da tutta rauba da l'entira Engiadina.

Xaver Frieser – butia cun artitgels da sport nordic

Xaver Frieser è oriundamain da la Bavaria e viva dapi 15 onns en Engiadina. A Scuol ha el er emprendì rumantsch pervi da ses uffants. L’um da 42 onns maina dapi tschintg onns ina butia cun artitgels da sport nordic en il quartier.

Fadri Truog – turnà da Turitg

Fadri Truog è creschì si a Pütvia en il quartier Scuol Ost. Suenter avair bandunà l’Engiadina cun 20 onns en direcziun Turitg è l’um da 42 onns turnà puspè a Scuol cun famiglia. Ses dachasa dapi il 2019 sa chatta be var 200 meters davent da la chasa paterna. Fadri Truog prezia fitg che ses dus mats pon passentar ina uffanza sumeglianta a quella ch’el ha pudì giudair en il quartier.

Sandro Fedi – mainagestiun dal Denner

Sandro Fedi maina il la butia dal Denner en il quartier. La butia na sa chatta betg sper la via principala, mabain è in zic dasperas, quasi zuppa. Ma quai na saja nagina sfida, blers lavurants vegnian gia la damaun ed el haja avunda parcadis.

Ils trais mats dal quartier

Severin, Andri ed Enea èn ils megliers amis e passentan lur temp liber sche pussaivel adina ensemen. Saja quai la stad cun giugar a ballape sin ils prads enturn chasa u era faschand iglus e pops da naiv l’enviern.

Johann Neuhäusler – pedel dals Monolits

Johann Neuhäusler e sia dunna èn ils pedels dals Monolits. Quai signifitga blera lavur enturn e dadens las set chasas! Sgumbrar naiv l’enviern e tagliar l’erva la stad èn be ina pitschna part da lur lavur. Far endretg a tut ils abitants e tuttas abitantas è bunamain impussibel.

Burtel Thom – dapi 45 onns a Scuol Ost

Quai ch'haja sa midà ferm ils ultims onns, è ch'igl è vegnì fabritgà fitg bler ils ultims onns. Cura ch'el ha cumprà il terrain, haja be dà duas chasas en il quartier, di Burtel Thom. El stettia dentant gugent al lieu, dentant haja dà ils ultims onns bler dapli traffic. Quai er causa la via da transit en direcziun Val S-charl e Halla da glatsch Gurlaina. Ins haja tut quai ch'ins dovra per viver en il quartier. Ultra da quai è Burtel Thom grond fan da la lutga ed er da bittar il crap dad Unspunnen.

Sara Rauch e Nina Magni – las magistras che partan ensemen ina WG

Er ellas duas han gugent la quietezza suenter la lavur. Unicamain ch’ellas hajan da s’organisar bain per ir a far cumissiuns perquai che las dunnas na possedan betg in auto.

Fadri ed Annamaria Schorta abitan dapi trais onns en il quartier

Ils ustiers pensiunads han fatg midada dad Ardez a Scuol en in’abitaziun en ils Monolits, nua ch’els han chattà la ruassaivladad ch’els hajan tschertgà. Il temp d’advent giaudian els fitg. Fadri Guidon ha perfin survegnì in agen chalender d’advent da sia dunna:

Quartier «Scuol Ost»

Il quartier «Scuol Ost» na datti betg en furma uffiziala da la vischnanca da Scuol. El definescha dentant il quartier che sa chatta en il ost da la fracziun da Scuol e cumpiglia tut ils bajetgs davent dal flum Clozza fin a Serras e da Pütvia fin a Manaröl.

Caracteristic per quest quartier èn cunzunt ils «Monolits» da Scuol, ina surfabricaziun da chasas d’abitar ch’è vegnida erigida il 2020. L’intent era da transfurmar in’anteriura zona da mastergn en in quartier d’abitar attractiv. Plans per ina segunda fabricaziun da chasas da monolit existan er gia.

Part dal quartier Scuol Ost fa er la zona da mastergn en il sid cun la deponia da la Reto Crüzer SA. Ch’i sa tractava ina giada d’ina zona da mastergn pli gronda, vesan ins anc adina vi dals differents bajetgs en il quartier.

Il num da la vischnanca:

Scuol vegn cun gronda probabilitad dal pled latin «scopulus» quai che vul dir grip u spelm – per tudestg «Klippe». Plausibla è quella derivanza sch’ins guarda il lieu da la baselgia ch’è sin in grip marcant sur la riva da l’En. Fin il 1969 aveva Scuol anc num uffizialmain «Schuls».

Suenter il gea da passa 80 % da la populaziun, è Scuol fusiunà dapi il 2015 cun ils tschintg lieus Ardez, Ftan, Guarda, Sent e Tarasp a la nova vischnanca Scuol.

Tras quella fusiun è la vischnanca da Scuol uss cun 439 km² la vischnanca cun la pli gronda surfatscha en Svizra. Cun 4'700 abitantas ed abitants è ella er la pli gronda vischnanca rumantscha en Grischun.

La surfatscha da Scuol:

Da las 14’414 hectaras dal lieu Scuol, è be ina fitg pitschna part terrain abitada. Dentant er sch’igl èn be 1,2% da la surfatscha totala, èn quai anc adina 176 hectaras (1 ha è 10’000 m²). In quart da la surfatscha totala è terrain agricul, in ulteriur quart guaud e chagliom. La gronda part (46%) vegn dentant definì sco surfatschas betg productivas.

La vopna da Scuol: