Mintga persuna dovra per di circa 160 liters aua e quella sto era vegnir nettegiada. En Engiadin'Ota fa quai dapi trais onns la ARO a S-chanf. Il fabricat nov sur quatter plauns ha custà passa 76,5 milliuns francs. Quella serenera tutga tar las pli modernas da l’entira Svizra.
Noss job ha bleras fassettas, da la mecanica sur la chemia enfin tar l’administraziun.
L’ARO nettegia l’aua persa da 9 vischnancas da l’Engiadin’Ota. La serenera funcziuna en furma da moduls. Tut tenor stagiun pon ins augmentar la capacitad. Maximalmain è l’ARO concepida per nettegiar l’aua da radund 110’000 persunas. Durant las vacanzas da stad è circa 1/3 da la capacitad maximala en funcziun – quai è era il temp per far revisiuns da maschinas. Sco per exempel vi dals butschins da smarschin.
Betg tut quai che vegn tar nus avess da vegnir tramess giu da la tualetta. Mintgina e mintgin savess atgnamain tge che tutga en ina tualetta e tge betg.
Il pli concret, vesa la laboranta da chemia, tge che riva en l’aua persa. Ella examinescha l’aua malnetta ma era l’aua netta. Las valurs che han da vegnir resguardadas èn severas. Interessant per ella è surtut il nitrit, che mazza ils peschs ed il fosfat, che lascha crescher las algas en l’aua.
80% da l'energia electrica, che la serenera dovra, vegn producida sezza. Grazia al gas da metan è l'ARO a S-chanf quasi autarca.
Or da l'archiv