Per la 13avla ediziun da la Diagonela en Engiadin’Ota ha il comitè d’organisaziun enturn il president Ramun Ratti pachetà ora il plan B. Midaments dal traject hai dà per las lungas cursas da passlung «La Diagonela» e «La Sfida».
Omaduas cursas da passlung avessan atgnamain stuì passar tras il God da Staz tranter Puntraschigna e San Murezzan. En quest passagi neuralgic n'èsi betg pussaivel da far naiv artifiziala, e la naiv natirala manca.
Per ina cursa da passlung en il stil classic na basta betg la naiv per ils vials. Uschia n'èsi betg pussaivel da metter a disposiziun ina loipa che cuntenta.
Il medem problem ha era il traject da la «La Saireda» che avess purtà en la Val Roseg. Era qua manca la naiv natirala.
Midaments betg novs
Suenter ch'ins ha surpiglià a curta vista dal 2014 la «Jizérska Padesàtka», ina cursa da passlung en Tschechia, ha il comité d'organisaziun enturn Ramun Ratti durant quests 13 onns stuì adattar numerusas giadas ils trajects. Era gia l'onn passà n'èsi betg stà pussaivel da duvrar las pistas en la Val Roseg e tras il God da Staz.
En prima lingia han las vischnancas gia fatg ina gronda lavur da preparar las loipas. Uschia na duain nus betg mo far grondas lavurs d’ennavar.
Ils midaments da l'onn passà vi da las trais cursas èn circa ils medems sco quest onn. Damai che la Diagonela dovra las loipas da passlung d'Engiadin'Ota, n'ha l'organisaziun betg da producir ina gronda massa da naiv artifiziala.
Per la 13avla ediziun ina novitad
Durant la pli curta cursa sur 6,5 kilometers tranter Zuoz e S-chanf, pia «La Cuorta», han quest onn era ils uffants e giuvenils la pussaivladad da cumbatter per podests. Ensemen cun l'uniun da skis grischuna vegn quest onn manà tras per l'emprima giada ina cuppa da passlung. Damai che l'infrastructura è pronta, ha quai fatg senn da nizzegiar quella per l'avegnir dal sport da passlung, uschia Ramun Ratti.
Il program
En gievgia saira cumenza il program da la Diagonela a Puntraschigna cun la «La Saireda». La cursa da passlung porta da la partenza a Schlarigna ed enavos. En sonda, partan era las duas cursas «La Diagonela» cun 47 kilometers e «La Pachifica» cun 25 kilometers, davent da Puntraschigna fin Zuoz. Dentant parta la pli curta cursa, «La Cuorta» cun 6,5 kilometers, ensemen cun la cuppa da passlung da l’uniun da skis grischuna a Zuoz e porta a S-chanf e danovamain enavos a Zuoz. Tut questas cursas da passlung èn en il stil classic, auter che «La Sfida» cun 23 kilometers en il stil liber, che parta la dumengia davent da Puntraschigna sco ultima cursa da la Diagonela 2026.