Siglir tar il cuntegn

Header

audio
10avla ediziun da La Diagonela
Or da Actualitad dals 20.01.2023. Maletg: Keystone
laschar ir. Durada: 3 minutas 26 Secundas.
cuntegn

La Diagonela Per la 10avla giada diagonal tras la Val

Victoria dubla svedaisa tar la 10-avla ediziun da La Diagonela in Engiadina Auta. Emil Persson ha gudagnà la cursa sur 48 kilometers en il sprint avant ses cunpatriot Max Novak ed il Norvegiais Stian Hoelgaard. Meglier indigen è stà Gian Flurin Pfäffli da Puntraschigna sco 54avel.

Tar la cursa d’elita da las dunnas ha quai dà ina trai dubla victoria Norvegiaisa. La pli sperta è stada Astrid Slind, avant Emilie Fleten e Magni Smedaas. Meglra Svizra è Solene Faivre sco 33avla.

La derivanza

Planisada era l’emprim’ediziun da La Diagonela oriundamain il schaner 2015. Pervia da mancanza da naiv en la Tschechia l’onn 2014 han ils responsabels da La Diagonela surpiglià la cursa da la VISMA Ski Classics e manà tras la cursa da profis en Engiadin’Ota. Dapi la segunda ediziun era la cursa lura betg pli be per profis mabain er per sportistas e sportists populars. La finamira dals organisaturs era ina cursa da passlung populara en il stil classic.

Naiv era adina puspè in grond tema

Gia tar la segunda ediziun hai dà er en Engiadin’Ota pauca naiv – ils organisaturs han stuì cumbatter, producir naiv artifiziala ed adattar il traject. In scenari che sa ha repetì adina puspè. Da quellas 10 giadas han ins pudì far La Diagonela, cun sia cursa principala sur 65 kilometers, be duas giadas sin il traject original. Er las temperaturas fraidas dal schaner han adina puspè chaschunà discussiuns. Il lieu da partenza a Zuoz n’era betg ideal, perquai ch’igl è in dals puncts ils pli fraids dal traject. L’onn passà han ils organisaturs perquai spustà il lieu da partenza a Puntraschigna e scursanì il traject per 10 kilometers. Sper il traject lung èn er La Pachifica cun 27 kilometers e La Cuorta cun 11 kilometers part da l’eveniment. Er quest onn datti puspè adattaziuns.

Sfidas er il 2023

Malgrà tut ils sforz dals ultims 10 onns han ins stuì scursanir er quest onn la cursa e desister sin il gir tras il guaud da Staz fin a San Murezzan ed enavos. L’occurrenza saja in success, di il president dal comité d’organisaziun Ramun Ratti. Onn per onn crescha il dumber da participantas e da participants, da radund 600 sin 1’200 quest onn. Cumenzà avev’ins cun in budget da 150’000 francs. Quel è creschì sin radund in mez milliun francs. Il di da la cursa lavuran radund 250 voluntaris e la cursa vegn emessa en la televisiun da plirs pajais sin tut il mund.

audio
Sfidas tar il traject
ord Actualitad dals 20.01.2023. Maletg: RTR, Roman Dobler
laschar ir. Durada: 2 minutas 50 Secundas.

Ramun Ratti è persvas che l’investiziun renda. D’ina vart maina la preschientscha televisiva ina reclama betg pajabla e da l’autra vart generescha mintga curridur en media trais pernottaziuns en la regiun.

video
La Diagonela ha lieu per la 10avla giada
Or da Telesguard dals 18.01.2023.
laschar ir. Durada: 3 minutas 19 Secundas.

RTR actualitad 6:00

Artitgels legids il pli savens

Scrollar a sanestra Scrollar a dretga