Siglir tar il cuntegn

Header

cuntegn

Diagonela en mauns scandinavs Success traidubel norvegiais e svedais tar La Diagonela

Kasper Stadaas gudogna avant Stian Hoelgaard e Mikael Gunnulfsen la cursa dals umens d’elita. Tar las dunnas festiveschan las Svedaisas ina victoria traidubla. I gudogna Ida Dahl avant Britta Norgren e Lina Korsgren.

Gia per la novavla giada fa la Visma Ski Classics fermativa en l’Engiadin'Ota. La Diagonela, la cursa da distanza sur 55 km, è la cursa indigena. Cuntrari ad auters onns è la Diagonela vegnida scursanida questa giada per 10 km sin nov 55 km. Nov è era stada la partenza da la cursa a Puntraschigna.

Ils Scandinavs han dominà La Diagonela

Sco gia auters onns è La Diagonela ediziun 2022 puspè stada insatge per las equipas scandinavas. Là nua che la tgina dal passlung classic è. Tar ils umens era Kasper Stadaas da la Norvegia il pli spert, tar las dunnas ha Ida Dahl da la Svezia triumfà.

Arnaud Du Pasquier è il meglier indigen

La carriera dal passlungist da Puntraschigna ha cumenzà cun La Diagonela l’onn 2018. La Diagonela è sia cursa da chasa ed el ha stipulà avant la cursa da vulair far il pass tranter ils megliers 30. A l’entschatta guardava quai ora bain, lura dentant en la Val Roseg è Du Pasquier sgulà. E suenter, radund diesch kilometers avant la fin, ha el perfin rut cun in bastun il ski. Uschia na era la finamira che el aveva stipulà avant la cursa betg pli pussaivla. Tuttina ha Arnaud Du Pasquier terminà la cursa, el è vegni 45avel ed uschia meglier indigen. Tar las dunnas era Seraina Kaufmann da Malix la meglra grischuna. Ella ha terminà la Diagonela sin plazza 35.

audio
Arnaud Du Pasquier meglier indigen
ord Actualitad dals 22.01.2022.
laschar ir. Durada: 2 minutas 45 Secundas.

Bilantscha positiva

Passa 1’000 curriduras e curridurs han fat part a La Diagonela 2022. Suenter che i ha dà l’ediziun la stagiun passada «mo» cun curriduras e curridurs professiunals è quai segira in success.

audio
Bilantscha da la Diagonela cun Ramun Ratti
ord Actualitad dals 22.01.2022.
laschar ir. Durada: 3 minutas 31 Secundas.

As verifitgà as ha era la nova partenza a Puntraschigna ed il traject uss in zichel pli curt. La cursa roiala da la Diagonela è uss 55 km.

RTR actualitad 17:00

Artitgels legids il pli savens