Per pudair crear nov spazi d'abitar per indigens aveva la radunanza communala da La Punt Chamues-ch deliberà gia il december 2023 in credit da 13,6 milliuns francs per ina surfabricaziun cun quatter chasas. En quellas èn previsas passa 20 abitaziuns pajablas per indigens. Quel project duess vegnir realisà sin duas parcellas na cunfinantas ch'èn en possess da la vischnanca burgaisa e politica e che sa chattan en direcziun dal Pass da l'Alvra.
Insumma fiss quai stà previs che las lavurs da construcziun cumenzassan gia questa primavaira. Ma cunter las duas chasas sin la parcella da la vischnanca burgaisa ha quai dà quest mars in recurs da segundindigens tar la Dretgira superiura dal Grischun. Perquai aveva la vischnanca decidì d'etappar il project.
Surdada da las lavurs anc quest december
Sin dumonda da la FMR ha il chanzlist communal da La Punt Chamues-ch, Urs Niederegger, confermà che las lavurs per l'emprima etappa – pia las duas chasas sin la parcella da la vischnanca politica – cumenzian ussa definitivamain la primavaira che vegn. «En quel connex lavurain nus plainamain ed avain dacurt er gist scrit ora las lavurs. Nus avain previs da surdar las lavurs anc quest december, uschia che nus pudain cumenzar en avrigl 2026 cun il fabricat», di Urs Niederegger.
Nus avain gist scrit ora las lavurs.
En connex cun la segunda etappa – pia las duas chasas sin la parcella da la vischnanca burgaisa – n'ha quai tenor il chanzlist da La Punt Chamues-ch anc betg dà novas. Quai vul dir ch'il recurs è anc adina pendent tar la Dretgira superiura dal Grischun. Cura che quella segunda etappa pudess alura vegnir realisada n'è perquai anc betg cler. E sche las recurrentas e recurrents tiran vinavant la chaussa a Losanna davant il Tribunal federal, alura vegn la vischnanca da La Punt Chamues-ch a stuair avair vinavant pazienza cun la segunda etappa.