In tren da la Viafier retica ha tschiffà sonda saira tschintg chavals a Madulain. Quai ha communitgà la Polizia chantunala. Tut ils tschintg animals sajan vegnids mazzads. Vi dal tren haja dà in grond donn da material. Tenor emprimas enconuschientschas èn ils chavals ruts or d’in claus a La Punt Chamues-ch. Suenter èn els sa muvids sur ils binaris en direcziun Madulain. En il medem mument è ina cumposiziun da tren ida a val tar la staziun da Madulain en direcziun da La Punt Chamues-ch. En ina curva nunsurvesaivla èsi lura vegnì tar la collisiun tranter ils animals ed il tren. Tut ils tschintg animals èn vegnids mazzads al lieu.
Salvament difficil
Pervi dal lieu d’eveniment isolà ha stuì vegnir consultà in vehichel spezial da la Viafier retica da Zernez per rumir il lieu d’accident. Fin la fin da las lavurs al lieu d’eveniment èn crudads or otg trens ch’èn vegnids remplazzads cun bus. La Polizia chantunala dal Grischun sclerescha las circumstanzas da quest accident da viafier.
