Urs E. Schwarzenbach è il possessur da l'Engadin Airport SA, la gestiunaria da la plazza aviatica a Samedan. Il milliardari, commerziant d'art e possessur da l'hotel Dolder a Turitg dat adina puspè da discurrer pervia da debits da taglia. Il mars da quest onn ha il Tribunal Federal refusà in recurs dad el encunter l'uffizi da scussiun da la Regiun Malögia. Quel aveva segirà sin incumbensa da l'uffizi da taglia turitgais valurs da facultad en l'autezza da 140 milliuns francs.
Il portal Inside Paradeplatz scriva uss che Schwarzenbach stoppia generar liquiditad ed haja perquai vendì tranter auter ses aviun. Cun quest pass pudess el tenor il portal perder ses interess vi da l'Engadin Airport SA. Quai dentant dementescha ses advocat, dr. Ulrich Kohli envers RTR. La plazza aviatica al stettia fermamain a cor ed el n'haja nagins plans da vender quella.
Il medem di er Christian Meuli, president da l'Infra, la societad d'infrastructura che posseda l'infrastructura da la plazz aviatica. La collavuraziun cun Urs E. Schwarzenbach saja adina stada e saja anc adina buna e sco pajataglia en Engiadin'Ota na stoppian ins far nagins quitads ch'el pudess dar ord mauns sias aczias.
