Maraton da velo Engiadina - Per la 20avla giada datti la cursa sin las vias engiadinaisas

Las cursas dal Maraton da velo Engiadina mainan la sonda l’emprim sur ils pass da la Forcola di Livigno e dal Bernina, e la dumengia sur ils pass Flüela ed Alvra ed enavos en Engiadina. La «Cuorta», cun 97 kilometers ed enturn 1'400 meters d’autezza, e la «Svizra» cun 117 kilometers e circa 2'800 meters d'autezza.

Jon Fanzun junior è per l’emprima giada da la partida

El è 30 va gugent a rampignar cul parasgol, el gioga a golf e va cul velo. Jon Fanzun che fa part a la direcziun da la butia da sport «Jon Fanzun SA» cun sez a Scuol ha fatg per l’emprima giada la cursa da velo sin via.

Grazia a la fitg buna organisaziun ha gì Jon Fanzun ina buna cursa, senza incaps. La voluntarias e voluntaris sin il traject han fatg buna lavur, tenor Fanzun. Questa è stada la emprima cursa ed el ponderescha da vulair ristgar il proxim on sin il traject pli lung da 117 kilometers sur il Flüela e da return sur il Pass dal Alvra a Zernez.

Bell’aura, nagins incaps – il president è cuntent

Radund 1’000 curriduras e curridurs han fatg la cursa da 97 kilometers cul nom «La Curta».

La cursa cun start ed arrivada a Zernez ha funcziunà senza gronds accidents. Grazia ad ina coordinaziun e diversas mesiras da segirezza ha tut funcziunà sco planisà, uschè Bezzola. Oravant tut la nova mesira da spustar l’arrivada curt avant la vischnanca as ha verifitgà fitg bain. Uschè dis sco oz dattan gronda motivaziun da proseguir cul event che giubilescha quest’on seis 20avel anniversari.

Impressiuns dal Maraton da velo Engiadina 2026

Dapli traffic e dapli sfidas

Per il directur da la cursa Flurin Bezzola èn las cursas adina in'attracziun. Ma il traffic ch'è vegnì onn per onn pli ferm – quel è ina sfida per organisar l'occurrenza.

Sur tut la fin d’emna spetga l’organisaziun passa 1'500 ciclists e ciclistas. Sin las vias ed ils pass datti puncts da fricziun. Quai ha era badà il fundatur da la cursa, Jachen Bass. El ha fatg part bunamain 15 giadas a las cursas.

La davosa giada che Jachen Bass è sa participà a «sia cursa», ha el fatg l'experientscha ch'ils automobilists èn stads malpazients. Perquai desistia el dapi lura da sa participar. Tenor Bass è il traffic s'augmentà adina pli fitg dapi las emprimas ediziuns dal maraton da velo.

Il traffic sin via è ina gronda sfida

Il maraton da velo sin via era a l'entschatta in success, durant il temp da corona èsi vegnì pli ruassaivel, ma uss sent'ins puspè in cler trend ensi, di il president dal comité d’organisaziun Flurin Bezzola. El s'engascha dapi 16 onns en ina u l'autra funcziun tar il maraton.

Il traffic è s'augmentà per radund trais fin quatter giadas dapli cumpareglià cun l'entschatta avant 20 onns. La segirezza da las curriduras e dals curridurs è ina gronda sfida. Pli baud duvrav'ins voluntaris che coordinavan il traffic, ozendi fan quai sulettamain profis e quai è char.

Il maraton da velo sin via generescha radund 4’000 pernottaziuns en la regiun enturn la vischnanca da Zernez.

Idea d'entusiast

Cun far differentas da questas cursas en la Germania ha Jachen Bass gì l'idea, che l'Engiadina fiss predestinada per talas cursas da velo. Ensemen cun l'organisaziun turistica da la vischnanca da Zernez ha el organisà per l'emprima giada il Radmarathon Engiadina. Suenter che l'emprima ediziun ha pudì beneventar radund 2'000 ciclists e ciclistas, ha era la vischnanca mess da la vart il scepticissem ed ha da là davent surpiglià adina pli fitg il manaschi da la cursa.

Il fundatur piglia uss pli patgific

Suenter che Jachen Bass n'aveva betg pli da s'occupar cun l'organisaziun, ha el fatg part blers onns a sia cursa. Sco ciclist entusiastic ed ambizius ha el però suenter quellas 15 giadas dà si da far part a las cursas. Ma anc adina è el savens en la sella, er en sia segunda patria la Sardegna. Ozendi però plitost per restar fit ed era giudair la cuntrada durant ses trajects. Per l’anniversari da sia cursa turna el gugent puspè enavos en patria. Però be sco aspectatur e fan da velo.