Igl è puspè uschè lunsch: la stagiun da construcziun ha cumenzà. I vegn chavà, spizzà e betunà. Dapertut ves’ins ils lavurers da construcziun, cun lur chapellinas e vestgadira da segirezza. Per maschinists e maschinistas da vehichels da construcziun na basta quai en l'avegnir però betg pli.
Curs cun examen final
A partir da l’onn 2027 dovra numnadamain mintgin e mintgina che vul manischar in vehichel da construcziun ina licenza. L'emprima finamira è d'evitar accidents. Tenor l’ultima statistica da l'assicuranza SUVA datti en Svizra en media var 1'300 accidents l’onn cun maschinas da construcziun. Sis dals accidents cun consequenza mortala. Perquai han ins decidì l’obligaziun d’ina patenta per talas maschinas. Il curs dura trais dis e cuntegna ina part pratica ed ina part teoretica. A la fin suonda in examen final da tuttas duas parts.