Siglir tar il cuntegn

Header

video
Müstair dovra aua – la situaziun è però sin sa calmar
Or da Telesguard dals 28.06.2022.
laschar ir. Durada: 3 minutas 37 Secundas.
cuntegn

Müstair Appel da spargnar aua para d'avair gidà

Suenter l'appel da la fracziun da Müstair da spargnar aua da baiver, para la situaziun per il mument puspè da sa calmar. Quai ha confirmà il funtaner Marcus Cola a RTR. Ils reservuars s'emplainian puspè zic e zic.

audio
Val Müstair dovra soluziuns per provediment cun aua
ord Actualitad dals 29.06.2022.
laschar ir. Durada: 2 minutas 5 Secundas.

Betg nova situaziun

La vischnanca da Val Müstair aveva appellà a la populaziun da la fracziun da Müstair da betg duvrar inutil aua da baiver. Quai pervi che quella na saja actualmain betg avant maun en abundanza, uschia il funtaner da la vischnanca. Gia dapi l’atun da l’onn passà haja la regiun survegnì pli pauca plievgia. 

Dapi il settember 2021 n’avain nus mai pli gì las quantitads d’aua ord las funtaunas sco quai che nus eran disads.  
Autur: Marcus Cola responsabel per l’aua en Val Müstair
audio
Müstair sto spargnar aua da baiver
ord Actualitad dals 22.06.2022.
laschar ir. Durada: 2 minutas 23 Secundas.

La fracziun da Müstair è situada da la vart dal sulegl, cun pauca naiv ed haja perquai gia gì difficultads d’emplenir mintgamai ils reservuars d’aua. En media dovran ils abitants e las abitantas da Müstair 350 liters aua la minuta. Per spargnar aua da baiver duai la populaziun actualmain reducir il consum d’aua e sche pussibel desister da dar aua al pastg en iert u da lavar l’auto.

Agricultura ha autra funtauna

Che la mancanza d’aua pudess esser ina consequenza dal sauar la prada, na saja betg il cas, uschia Marcus Cola. Ils purs enturn Müstair retirian quell’aua ord il flum dal Rom.

L'appel d'avant in'emna ha gidà. Sche la mancanza avess cuntinuà, lura avess la vischnanca stuì scumandar l’utilisaziun d'aua da baiver per tschertas lavurs. Ina situaziun sumeglianta haja gia dà en Val Müstair avant plirs onns ina giada.  

RTR novitads 17:00

Artitgels legids il pli savens