Mintga creatira dovra aua per viver e baud u tard tschertgan er ils animals la funtauna d'aua. Saja quai per baiver, far bogn u sa frestgentar. Cura ch'ils animals bandunan puspè la funtauna da l'aua, laschan els enavos lur fastizs – fastizs da DNA. La DNA sa zuppa p.ex. en ils chavels u en ils excrements dals animals. En il Parc Naziunal Svizzer han perscrutadras e perscrutaders vulì savair quant bain ch'ils fastizs da DNA possian vegnir cumprovads.
Las examinaziuns n'han betg gì lieu sin il terren dal guaud, mabain en ils auals ed en ils flums dal parc naziunal. Flurin Leugger ha declerà co ch'il process funcziuna:
L’aua vegn pumpada or da l’aual e cula tras in filter. Il material organic po uschia vegnir filtrà ed examinà.
Suenter vegn il material transportà en il labor, nua che la DNA vegn extratga e perscrutada sin fastizs da capricorns u d'autras spezias d'animals. I dat in bun motiv, daco che la gruppa è gist sa focussada sin la DNA dal capricorn:
Ils guardians dal Parc Naziunal Svizzer san exact nua ch'ils capricorns vivan. Cun questa savida pudain nus controllar, sche nus chattain era là fastizs da DNA, nua ch'ils capricorns abitan.
En quatter da totalmain sis auals e flums han els pudì scuvrir la DNA dal capricorn. La gruppa ha chattà dapertut fastizs, nua ch'els avevan era spetgà quai. Uschia han els pudì confermar che la nova metoda da tschertgar funcziuna.
Er en il futur po questa tecnica esser nizzaivla e quai cunzunt en territoris ch’èn grevamain accessibels. Las spezias d’animals pon vegnir determinadas tras quai era senza che quellas stoppian vegnir vesidas. L’unica cundiziun è che las auas stoppian esser avant maun en il territori d’inquisiziun.
