Tgi che s'entra en chasa tar ina famiglia deditgada cun corp ed olma plainamain al sport da passlung, quai è gia arrivond en il pierten pli che evident. L'emprim che ins vesa numnadamain – gist a dretga en in dals tschelers – è ina trentina pèrs skis da passlung che stattan en parada ensemen cun bastuns, chalzers, satgets e varsaquantas truclas cun giaccas, manetschas, regurdanzas da pli baud ed ina pruna differents products ed utensils per tschairar.
Qua en il pierten na guarda betg mo ora da passlung, i savura perfin da passlung. «Quai è be la mesadad da la roba», salidan Martina e Buolf Näff riond da stgala giu. «Normalmain avain nus qua bler dapli roba.» Els èn ils geniturs dals dus giuvens passlunghists Noe ed Isai Näff da Sent. U sco ch'els sa preschentan: «Ils dus pli gronds fans da lur figls!»
Tranter plaschair e displaschair
Che il pierten è pel mument per la mesadad vid cun roba da passlung, quai ha in intent. Noe Näff, il frar pli vegl, dastga numnadamain partir per l'emprima giada en sia giuvna carriera als gieus olimpics – quai per las cursas da sprint – entant che per Isai Näff haja gì num da restar a chasa.
Igl è capità tut uschè svelt. Anc n'avain nus gnanca realisà endretg.
Che ins haja bain adina tegnì ils poleschs e sperà sin talas bunas novitads, però che esser propi segir, na possia ins mai – fin a la fin betg. «Gea, e cur che la novitad è lura arrivada, avain nus gì natiralmain fitg gronda superbia e plaschair per Noe. Ma da l'autra vart, gist uschè gronda malavita che quai n'ha betg bastà per Isai. Er el avess numnadamain merità da pudair partir als gieus olimpics», declaran ils dus geniturs in zic trists. Che quai als haja tutgà sco entira famiglia. «Er Noe ha stuì l'emprim ina giada digerir questas novitads.»
Noe ed Isai èn numnadamain bler dapli che be dus frars: els èn dapi pitschens ensi fitg buns amis, collegas da squadra – sper e sin la loipa – e sche pussaivel, praticamain adina ensemen. S'enclegia che Noe avess gì grond plaschair da pudair partir er questa experientscha ensemen cun ses frar. «El telefonescha adina puspè e raquinta ch'el haja grond gust e ch'el s'allegra fitg per ses emprims gieus olimpics», tradescha Buolf Näff, però: «Jau crai schon che Isai al manca. Fin l'ultima cursa avant la selecziun guardava quai ora numnadamain bain per tuts dus.»
Ina colliaziun stretga dapi pitschens ensi
Che tenor ils geniturs na sajan ils dus frars betg mo dal caracter fitg sumegliants, ma er ord vista sportiva. Gia da pitschens ensi sajan las prestaziuns da Noe ed Isai stadas adina magari sumegliantas.
Resguardond be la differenza da vegliadetgna – Noe ha 22 onns ed è cun quai dus onns pli vegl che Isai – as pudess perfin pretender che Isai saja anc in zic pli ferm che ses frar grond. Che er pervia da quai saja la dischillusiun che Isai n'è betg vegnì selecziunà per ils gieus olimpics a Milano Cortina da quest onn uschè gronda e fetschia tant displaschair en famiglia.
«Durant il decurs da la stagiun actuala ha Noe cuntanschì simplamain pli regularmain buns resultats. Entant che Isai ha cumenzà la stagiun fitg ferm, però ha lura gì da cumbatter cun pitschens dafraids e levs sintoms da stancladad», analiseschan ils geniturs la stagiun da lur uffants fin ussa.
Ed ils geniturs san da tge ch'els discurran. Lur figls numnadamain na enconuscha probablamain nagin auter uschè bain sco lur dus pli gronds fans. La famiglia Näff collia numnadamain ina relaziun tuttafatg particulara e fitg stretga, quai surtut grazia al sport da passlung. «Il liom tranter nus è fitg ferm. Pli baud cun quai che nus eran fitg involvads cun als sustegnair nua che nus pudevan ed ussa sco geniturs pli che superbis u davant la televisiun e sche insumma pussaivel, adina cur ch'i va live sper la loipa», manegia Buolf Näff dond in sguard enavos.
Dapli che «be» esser mamma e bab
Pli baud – e sco che quai è usit, sche uffants persequiteschan gronds siemis en il mund dal sport professiunal – han ils geniturs gì diversas autras funcziuns sper esser «be» bab e mamma. Cun grond plaschair ed engaschament han els numnadamain sustegnì lur figls durant ils emprims diesch onns da lur carriera a moda fitg intensiva. Martina Näff, da mastergn magistra da scolina a Scuol, era da quel temp manischunza da taxi, motivatura e la bun'olma da la famiglia. Ses um, da mastergn policist chantunal tar il post da polizia Engiadina Bassa a Scuol, era responsabel per il trenament, schef da material ed um da service.
«Quai eran fitg bleras uras, surtut viagiond cun l'auto che nus avain passantà ensemen», sa regorda Martina Näff.
Jau scheva adina che quai saja noss temp prezius da famiglia. Nus discurrivan e chantavan ensemen, uschia sco che autras famiglias passentan lur temp en in'autra furma.
Ed uschia sa regorda er anc Buolf Näff da las bain numerusas, ma surtut er bellas uras en servetsch per ses dus uffants. «Quants skis che jau hai tschairà, quai na sai jau betg pli da dir. In enviern hai jau però notà tut las uras che jau era giu en tschaler a preparar ils skis per mes mats. A la fin da quella stagiun eran quai in toc sur 100 uras. E da quel temp avevan els anc paucs skis chapescha.» Che tut quellas uras haja ins però investì adina fitg gugent e cun plaina satisfacziun.
Passlung – il sport da famiglia
Il sport da passlung accumpogna als Näffs pia gia tras la gronda part da lur vita da famiglia. In sport ch'er ils geniturs han fatg e fan anc adina – in cun dapli e l'autra cun in zic damain plaschair. «Il passlung ma pareva plitost adina fitg stentus ed jau hai fatg passlung ensemen cun la famiglia pli per far in plaschair a mes figls, e quel di ch'els m'han tschiffà ora, èsi stà finì per mai», conceda Martina Näff rient. Auter guarda quai ora tar ses um.
Buolf Näff è numnadamain sez ina persuna fitg sportiva, curra gugent durant la stad ed è adina da chattar enturn la loipa durant l'enviern. «Passlung è er mia gronda passiun. Pli baud anc era jau quel che deva aint il tact sin la loipa, ussa èn quai gia per divers onns mes figls», ria Buolf Näff che ha er sez gia pudì festivar durant il passà in pèr success en il sport da passlung.
Dapi divers onns prenda el numnadamain part als campiunadis svizzers da skis e passlung da la polizia. E la cursa da passlung, quella ha el gia pliras giadas pudì gudagnar. «Cun quai ch'i è ina cumbinaziun da ski alpin ensemen cun il passlung, n'hai fin ussa displaschaivlamain anc mai bastà per mai da gudagnar il titel. Per quel sun jau simplamain memia plaun culs skis.» Però dal segir dapli che ch'el giavischass a sasez ina giada ina medaglia a quests campiunadis svizzers, giavischass Buolf Näff ina medaglia a ses figl als gieus olimpics.