Il Passlung, quai è la cursa tradiziunala da Martina a Scuol. Dapi passa tschuncanta onns datti questa cursa. Magari vegn al Passlung era numna: il pitschen Maraton engiadinais. In mais avant la cursa tradiziunala en Engiadina Auta, datti la cursa en l’Engiadina Bassa.
Ils matadors locals van cun la plima
Davent da l’entschatta ha Isai Näff da Sent controllà la cursa dals umens. El ha gia attatgà suenter radund 5 kilometers sin l’autezza da Strada ed e vegni davent. A Ramosch 10 kilometers avant la fin aveva il giuven passlungist gia in avantatg dad ina minutas sin la concurrenza. En l’arrivada a Scuol aveva el in avantatg da duos minutas. Isai Näff ha gia fat passa diesch cursas sin livel da la cuppa mundiala da passlung. El era pia il grond favorit sin la victoria, ed il favurit ha triumfà. Segund è vegni il giuven Mic Willy da Scuol, terz Gian Duri Melcher da Puntraschigna.
Tar las dunnas ha dominà Seraina Boner da Tavau. L’anteriura passlungista da la cuppa mundiala ha gudagnà avant Sigrid Mutscheller da la Germania e Rahel Imoberdorf dal chantun Vallais.
Tar las cursas en il stil classic ha quai dà ina victoria da conjugals. Tar ils umens ha Hannes Pfranger da Scuol gudagnà la cursa, tar las dunnas sia consorta Susi Pfranger.
Totalmain han passa 130 passlungistas e passlungists fat part al Passlung 2026.
Avant la cursa
Actualmain è la naiv stgarsa er en l'Engiadina Bassa. Per far ina loipa cumpetitiva dovri almain 30 centimeters naiv. Naiv che manca actualmain en l'Engiadina Bassa. Perquai han ils organisaturs da la cursa Passlung da Martina a Scuol stuì ponderar davart alternativas.
La loipa pel Passlung è pronta
-
Bild 1 von 3. Situaziun en l'arrivada a Manaröl. Bildquelle: RTR.
-
Bild 2 von 3. La loipa è averta. Bildquelle: RTR.
-
Bild 3 von 3. La cursa ha lieu sin il traject original. Bildquelle: RTR.
Ponderà alternativas, la cursa po dentant avair lieu sin il traject original
Grazia a la buna lavur dals maschinists èsi grategià da far ina loipa da 20 kilometers da Martina a Scuol. Uschia che ils organisaturs da la cursa Passlung han pudì metter da vart las ponderaziuns davart trajects alternativs u trajects reducids. Ils ultims dis han ins pudì far il stizzi da la loipa da Martina a Scuol cumplettamain sin il traject original. La cursa ha pia lieu sin la loipa originala. Perquai ch'igl è grategià da stumplar naiv sin la loipa en ils lieus critics è la loipa ussa cumpletta. Per la cursa han ins perfin pudì far in stizzi per curriduras e curridurs che fan la cursa en il stil classic.
Situaziun precara da naiv en l’entira regiun procura forza anc per annunzias
En l'entira regiun da las Alps da l'ost è la situaziun da naiv actualmain precara. Curriduras e curridurs che fan gugent cursas s'infurmeschan perquai savens tar il president dal Passlung, Xaver Frieser, davart la situaziun en l'Engiadina Bassa. Ussa che la loipa è en funcziun, po quai dar anc ina u l'autra annunzia per la cursa da regiuns cunfinantas.
Tar l'ediziun da giubileum da l'onn passà avevan radund 180 curriduras e curridurs fatg part al Passlung. Quest onn quintan ils organisaturs cun in zic damain annunzias.