Las cursas en il stil classic èn las cursas per curriduras e curridurs da la Scandinavia. Sco savens durant ils ultims onns han els dominà era la 13. ediziun da La Diagonela. Tar ils umens èn 29 dals emprims 30 da pajais da la Scandinavia. Sulet Jeremy Royer sco segund vegn da la Frantscha.
Il pli spert era dentant puspè in Norvegiais. Amund Hopstock Riege ha duvrà per ils 47 kilometers da La Diagonela 1:57:22 uras.
Tar las dunnas vesa quai ora be in zichel auter. Tranter las emprimas 20 èn tuttina era tschintg curriduras da pajas betg dal nord. La pli sperta dunna era questa giada la Svedaisa Stina Nilsson cun in temp da cursa da 2:13:22 uras.
13. La Diagonela a Zuoz
-
Bild 1 von 3. Curridurs en l'arrivada a Zuoz. Bildquelle: RTR.
-
Bild 2 von 3. Ils pli sperts da La Diagonela. Bildquelle: RTR.
-
Bild 3 von 3. Meglier Svizzer: Curdin Räz da Segl sco 65avel. Bildquelle: RTR.
Il meglier Svizzer è stà sco gia la stagiun passada Curdin Räz da Segl. El terminescha la cursa sur 47 kilometers en il stil classic sin plazza 65. Lauro Brändli, da la medema equipa grischuna, è vegnì 82avel.
La meglra dunna svizra è stada Valerie Widmer dal Toggenburg sin plazza 42.
Cursa sin traject scursanì
Pervia da la mancanza da naiv en Engiadin'Ota ha il traject da La Diagonela stuì vegnir adattà. Uschia han ins gia decidì avant in'emna da reducir la lunghezza da la cursa roiala da 55 sin 47 kilometers. Tut la passascha sur il God da Staz è vegnida stritgada. Perquai han las curriduras ed ils curridurs fat duas giadas il traject tranter Puntraschigna e Schlarigna sur la loipa da siemi.