Fabienne (22) e Roman (20) Alder da Puntraschigna, Noe (22) ed Isai (20) Näff da Sent u Nadja (24) e Marina (22) Kälin da San Murezzan. Els n’è betg sulet fragliuns engiadinais, els han tuts era decidì da far carriera da passlung. Sco da dir; sch’il frar u la sora gronda va questa via lura fatsch jau il medem. Ma savens è il sport da passlung er in sport da famiglia, in sport che vegn savens dà vinavant dals geniturs.
Blers avantatgs
Ils fragliuns profiteschan en emprima lingia fitg in da l’auter, els motiveschan dentant er in l’auter e pon era sustegnair in l’auter. Savens vegn era trenà ensemen e magari èsi er ina tscherta concurrenza, ina sauna concurrenza che porta mintgin vinavant sin via al profi da sport.
La finala èsi però in sport singul, mintgin sto ir sia atgna via. La finamira, quella resta dentant tar tuts la medema, da fitgar pe en la cuppa mundiala ed avair success, gudagnar titels e medaglias. Ed il siemi da mintga sportist, dastgar sa participar a gieus olimpics.