Custs che creschan, tariffas che stagneschan e fits da credits per investiziuns han procurà per finanzas dischequilibradas tar l’ospital regiunal a Samedan.
L’onn 2025 – l’onn dal destin
Gist duas giadas ha la populaziun stuì decider davart l’avegnir da l'ospital. L'emprima giada ha il suveran stuì decider per u cunter ina fusiun cun l'Ospital chantunal a Cuira. Gist quatter dad 11 vischnancas han decis da betg vulair sustegnair questa fusiun.
Suenter quest naufragi han ils responsabels proponì a las vischnancas da sustegnair l’ospital cun 50 milliuns francs – per pudair reorganisar entaifer dus onns las structuras da l'ospital. Ma era questa proposta han quatter vischnancas refusà.
Ins prevesa in concurs
Actualmain sa chatta l’ospital en la fasa d'in moratori. In expert independent ha ussa in pled en chapitel per chattar ina schliaziun. I fa gronda prescha. Sche quel na chatta betg ina schliaziun valabla, prevesan ins in concurs durant ils mais da primavaira 2026.
Tenor las davosas infurmaziuns prevesan ins da fundar cun las chasas d’attempads e cun la Spitex in'atgna societad purtadra. La part dal salvament duess vegnir integrada en las structuras da la clinica Gut cun sedia a San Murezzan. Per la part generala èsi previs da collavurar cun l'Ospital chantunal a Cuira.
Ina terza votaziun è previsa
Il plan è pretensius e quel fa prescha. La fundaziun per il provediment da sanadad prevesa perquai da suttametter a la populaziun anc durant la primavaira 2026 il plan per l'avegnir da l'ospital regiunal. Questa giada però senza l’obligaziun che tut las vischnancas ston esser da la medema opiniun, questa giada duess valair mo la maioritad da la populaziun. La votaziun è previsa in favrer u mars 2026.