La mancanza da persunal qualifitgà saja actualmain in grond tema en il Centro Sanitario Poschiavo. L’atun dal 2020 han ins stuì serrar la partiziun da parturir, dapi questa primavaira na datti er nagina chirurgia ed anestesia. In dals motivs è tenor Giovanni Jochum, il president dal cussegl da fundaziun da l'ospital ch’i dettia memia paucs cas ed uschia saja il temp pers tranter ina operaziun e l’autra memia lung. Durant quel temp na possian ils spezialists er betg giudair il temp liber perquai ch’els hajan adina pichet.
Collavuraziun cun auters ospitals
Il cussegl da fundaziun haja però decis da vulair porscher puspè la chirurgia e l’anestesia. Er sche forsa be pli parzialmain, vul dir be pli in di l’emna u dus dis il mais. Perquai sajan ins tenor Giovanni Jochum actualmain vid sclerir differentas pussaivladads per ina eventuala collavuraziun cun l’ospital regiunal Samedan u er cun la Clinica Gut. Per l'ospital en il Puschlav saja impurtant ch’ins chatta ina soluziun che na lascha betg patir la qualitad.
Partiziuns che mancan en la Bregaglia ed en la Val Müstair gia dapi blers onns
Da principi cumbattan er ils ospitals en la Bregaglia ed en la Val Müstair cun sumegliants problems: La sfida da chattar medis u persunal qualifitgà sco er plitost paucs abitants ed abitantas quai che munta paucs tractaments. Tuttina n'èsi en il Centro Sanitario Bregaglia sco er en il Center da sandà Val Müstair nagin tema da reducir purschidas u schizunt serrar partiziuns. Anzi en la Bregaglia è p. ex. la purschida da Spitex u er quella da fisioterapia schizunt vegnida engrondida. Plinavant vegn realisà in project da sanaziun ed engrondiment per 14 milliuns francs, uschia il president da la cumissiun administrativa Maurizio Michael envers RTR.
Er l'ospital en la Val Müstair n'è betg en ina situaziun difficila. Bain quai che pertutga la tschertga da nov persunal, ma il mument hajan els avunda medis e medias sco er tgirunzas e tgirunzs. Perquai èn els tenor la CEO Judith Fasser il mument en ina situaziun che funcziuna bain.
Cumpareglià cun l'ospital a Poschiavo è il punct però che tant en la Bregaglia sco en la Val Müstair na datti gia dapi var 30 resp. bunamain 20 onns naginas partiziuns da parturir ed er betg da chirurgia ed anestesia. En quest context para la schliaziun da serrar u da tschertgar ina soluziun per in manaschi reducì a Poschiavo ina decisiun logica per motivs economics. Plinavant èn ils ospitals a Samedan u a Scuol cun tuttas purschidas cuntanschibels en bun in'ura da tut las trais vals.
La regiun Moesa collavura cun il chantun Tessin
En la Val Mesauc ed en la Val Calanca na datti nagin agen spital. Suenter che la Clinica San Rocco cun l'ospital acut è vegnì serrà avant radund 30 onns, ha il chantun Grischun fatg ina cunvegna cun il chantun Tessin. Sco Hans Imhof il coordinatur da la cumissiun sanitaria regiunala da Moesa ha ditg envers RTR, giajan radund 90% – 95% da la populaziun en l'ospital da Bellinzona a far las operaziuns. Las differenzas finanzialas tranter ils dus chantuns vegnian pajadas da las vischnancas pertutgadas e dal chantun. Il «tren» per in agen ospital en la Val Calanca ed en la Val Mesauc saja passà. Quai surtut era perquai ch’il chantun Tessin veglia bajegiar in nov ospital chantunal tranter Bellinzona e Giubiasco. Da quel possia lura era la regiun Moesa profitar ferm, ha ditg Imhof.
Peyer defenda provediment decentral
En la sessiun dal Cussegl grond han pliras deputadas e deputads exprimì lur quitads, tge consequenzas che la strategia da l’Ospital chantunal po avair per ils ospitals regiunals. Cun l’engrondiment dals edifizis a Cuira, la cumpra da la clinica Gut e quella da Walenstadt creschia numnadamain il squitsch dad esser rentabel e cun quai la concurrenza per ils ospitals pli pitschens.
Il minister da sanadad Peter Peyer fa dentant attent che la gronda concurrenza saja ordaifer il Grischun, surtut cun la medischina fitg spezialisada. Aifer il Grischun haja la regenza adina accentuà da vulair mantegnair la structura decentrala. Quai custia bain bler, dentant: «Nus vulain ans prestar quai», uschia Peyer.
