Siglir tar il cuntegn

Header

video
Inauguraziun da l'ovra communala En a Prutz
Or da Telesguard dals 04.11.2022.
laschar ir. Durada: 7 minutas 29 Secundas.
cuntegn

Ovra communabla En Forza per 90'000 chasadas

Suenter bunamain set onns da construcziun po l’ovra idraulica communabla En finalmain ir vi da la rait. Quai cun ina festa d’inauguraziun tar la centrala da la vart da l’Austria.

Di da festa a Prutz en l’Austria: Finalmain han ins pudì inaugurar l’ovra idraulica communabla En (GKI), in project da generaziuns cun collavuraziun sur cunfin tranter las Ovras electricas d’Engiadina e la Tiwag, las ovras electricas dal Tirol.

Cun questa nova ovra vegn duvrada en l'avegnir tut la capacitad dal flum En per producir forza idraulica. Ella tutga per 86% a las ovras electricas dal Tirol e per 14% a las Ovras electricas Engiadina e producescha forza per radund 90’000 chasadas.

audio
Impressiuns dad Anna Caprez live da la festa
ord Actualitad dals 04.11.2022.
laschar ir. Durada: 3 minutas 19 Secundas.
Oz è in grond di per la forza idraulica, in grond di per il Tirol, ma er per l’Engiadina e per il chantun Grischun. L’ovra electrica cuminaivla vegn gist il dretg temp.
Autur: Mario Cavigelli cusseglier guvernativ
audio
Intervista cun Mario Cavigelli
ord Actualitad dals 04.11.2022.
laschar ir. Durada: 3 minutas.

Project da model cun collavuraziun excepziunala sur cunfin

L’ovra communabla En n'è tenor ils responsabels betg mo in dals pli gronds projects d’infrastructura da las duas regiuns cunfinarias, mabain er in project che demussa ina ferma voluntad per ina collavuraziun excepziunala sur cunfin.

In focus spezial ha l’ecologia gì en quest project. Uschia han ins tar l’enchaschament ad Ovella pudì realisar tranter auter ina stgala da peschs sco era in model d’aua restanta dinamic. Quel duai en l'avegnir eliminar las fluctuaziuns da l’aua chaschunada entras la producziun da forza en l’Engiadina e garantir in current natiral da l'En en il Grischun envers l’En en il Tirol. La finamira è d’optimar la vita ecologica en e sper il flum.

Per extender l’autonomia d’energia e per garantir il provediment dal Tirol presta l’ovra electrica GKI ina contribuziun impurtanta. En spezial l’utilisaziun da la forza idraulica è la clav per il cumbat cunter la chareschia importada.
Autur: Anton Mattle president da la regenza dal Tirol
video
Sguard enavos sin ils differents plazzals da fabrica
Or da RTR dals 02.11.2022.
laschar ir. Durada: 1 minuta 41 Secundas.

Grond retard che custa in terz dapli  

La finiziun da la construcziun, en spezial da la galaria sco era dal enchaschament è sa spustada adina puspè en il passà. Quai tranter auter causa problems geologics e problems cun la surdada da lavurs. Uschia ha l’entir project cuzzà quatter onns pli ditg che planisà oriundamain ed enstagl da custs totals da radund 400 milliuns euros, vegn l’ovra communabla En a custar passa 600 milliuns euros. E malgrà tut ils retards e custs supplementars èn ils responsabels persvas che quest’ovra idraulica vegnia a render.

Nus essan en tuts reguards loschs d’avair realisà quest project cun success. Ils proxims decennis vegnin nus a racoltar quai ch’è gia vegnì semnà l’onn 2003 cun l’entschatta da las planisaziuns concretas dal GKI.
Autur: Johann Herdina mainagestiun GKI
audio
GKI: Sguard sin l'istorgia da l’ovra idraulica communabla En
ord Actualitad dals 04.11.2022.
laschar ir. Durada: 2 minutas 52 Secundas.

Cifras-clav

Avrir la box Serrar la box
  • Entschatta da las lavurs da construcziun: 2014
  • Perforaziun da la galaria: 2019
  • Lunghezza galaria: 23,2 kilometers
  • Prestaziun: 89 megawatt 
  • Producziun da forza durant in onn: circa 414 uras gigawatt
  • Volumen d’investiziun: radund 620 milliuns euros
  • Temp da fabrica: 7 onns

RTR novitads 16:00

Artitgels legids il pli savens

Scrollar a sanestra Scrollar a dretga