A la 69avla radunanza da las Ovras electricas d’Engiadina SA (OEE) han ils responsabels preschentà il quint da gestiun. La OEE ha producì 1,124 milliardas uras kilowatt durant l’onn da gestiun 2022/23, quai èn 14,8% damain che la media dals davos onns. Tenor il directur Giacum Krüger ha l’enviern cun pauca naiv ed ina stad fitg sitga procurà per quella diminuziun da producziun marcanta.
Il pretsch per la producziun da la forza electrica è creschì sin 9,82 raps/kilowatt. Tenor il directur Giacum Krüger ha la OEE gì custs pli auts durant l’onn, plinavant gì da far reservas e da tschella vart producì damain forza electrica.
La OEE SA ha fatg l’onn da gestiun 2022/23 investiziuns da radund 22 milliuns francs en l’atgna infrastructura. Il quint preschenta in gudogn da 4,1 milliuns francs.
Cunvegna per la sanaziun dal flum Spöl
Il president dal cussegl administrativ e cusseglier dals chantuns Martin Schmid ha infurmà ils acziunaris – ch’ins haja chattà finalmain ina schliaziun tranter il Parc Naziunal Svizzer, las organisaziuns per l'ambient ed il chantun quai che reguarda la sanaziun dal Spöl. Cun las lavurs da sanaziun prevesan ins da cumenzar l’onn 2026. Las Ovras electricas d’Engiadina han fatg per quest project reservas da radund 20 milliuns francs.
