Siglir tar il cuntegn

Header

audio
Glisch verda per proxim pass per schlargiar reservat
Or da Actualitad dals 05.05.2021.
laschar ir. Durada: 02:50 minutas.
cuntegn

Parc da natira e Biosfera Glisch verda per il project d'engrondir il parc

La conferenza da presidents da la Regiun Engiadina Bassa / Val Müstair ha dà glisch verda per cuntinuar cun il project per engrondir il parc da natira e biosfera sur il territori da las vischnancas da Val Müstair, Scuol e Valsot or.

Ils presidents e las presidentas da las vischnancas pertutgadas, sco era la cumissiun dal parc èn s'exprimids, sin basa dal studi davart la realisabladad, persuenter d'approfundar il project e d'examinar tge ch'i dovra per pudair realisar il parc. Uss duai vegnir examinà ensemen cun las vischnancas, il chantun, la Confederaziun e las differentas organisaziuns ils proxims pass. Il rapport final davar quellas tractativas duai esser l'atun 2021 sin maisa.

Il 2024 duai alura la populaziun da las trais vischnancas pudair decider davart l'engrondiment dal parc, per ch'il parc possia vegnir realisà sin il pli baud in'onn pli tard.

Studi davart la realisabladad

Tenor in studi dal 2019 saja in'engrondiment dal parc da principi pussibel. Blers partenaris regiunals sajan interessads ed il svilup stgaffeschia er ina plivalur per la regiun.

Actualmain exista l'Unesco Reservat da Biosfera Engiadina Val Müstair or dal Parc Naziunal Svizzer, il Parc da natira Val Müstair e parts da la vischnanca da Scuol. La regiun vesa dentant in grond potenzial, sch'ins pudess expandir il parc.

RTR Novitads 17:00

Artitgels legids il pli savens

Scrollar a sanestra Scrollar a dretga