Siglir tar il cuntegn

Header

cuntegn

Parc da sugas Engiadina Stadi da plantas n’era betg motiv per donn a Sur En

Auter che quai che singulas vuschs pretendan, saja il stadi da las plantas en il guaud a Sur En stà tut en urden. Quai conferman plirs perits. Uschia per exempel la vischnanca da Scuol sco er Christian Bolliger. El maina in biro da planisaziun tranter auter per parcs da sugas.

Tenor Bolliger sa tractia d’in eveniment inevitabel ch’è capità la fin da fanadur. Il stadi da la bostga vegnia controllà mintg’onn en ils parcs da sugas, uschia era en quel a Sur En dapi sia avertura il 2009.

Nagins plants

Sco la Polizia chantunala ha confermà ad RTR na dettia actualmain era betg insatgi ch’avess inoltrà plant encunter il donn subì suenter ils ferms vents ils 28 da fanadur a Sur En. I na vegnia era betg investigà en chaussa. Surprendentamain avevan quels vents buffà fitg local e destruì in entir areal. Surtut han ils vents sragischà u cupitgà ina 60ina da bostga en il Parc da sugas Engiadina ed er donnegià singulas rulottas sin il campadi gista dasperas. Per fortuna n’è nagin sa blessà.

Il di suenter ils ferms vents d’orcan è la plazza da campadi cun radund 200 giasts puspè stada averta cumplettamain. La stagiun dal Parc da sugas Engiadina è dentant finida, uschia il manader Wolfgang Bosshardt envers RTR.

audio
Per tadlar curt e cumpact
ord RTR Audio dals 03.08.2020. Maletg: RTR
laschar ir. Durada: 1 minuta 15 Secundas.

RTR novitads 12:00

Artitgels legids il pli savens