Dapi 15 onns exista a Zernez il center dal Parc Naziunal Svizzer cun in'exposiziun durabla ed exposiziuns spezialas che midan. Uss è il center vegnì inscenà cumplettamain da nov. La nov'exposiziun dal Parc Naziunal ha num «Cuntrada selvadia en il center» e s'occupa cun ils temas centrals dal parc, scrivan ils responsabels en ina communicaziun. Dad ina vart rendia ella palpabla ils spazis da viver intacts da la cuntrada protegida. Da l'autra vart mussia ella si, co spazis da viver sa sviluppan sche la natira na vegn betg disturbada da l'uman.
La nov'exposiziun mussa tenor atgnas indicaziuns impressiuns spectacularas or dal parc en ina stanza panoramica, in spectacul audio-visual en l'arena selvadia, in envista en la perscrutaziun en il labor sut tschiel avert e la relaziun persunala dals giasts cun la natira en la stanza da perspectivas. Tut ils cuntegns èn en tschintg linguas, per uffants pitschens datti staziuns ch'envidan a giugar – per uffants tranter 5-12 onns in gieu auditiv cun Furbina e Ratsch.
Project da 2,5 milliuns francs
La nov'inszenaziun da l'exposiziun en il center ha il Parc Naziunal implementà ensemen cun il team da Groenlandbasel da Basilea. Il project ha durà trais onns e custà radund 2,5 milliuns francs. Il center dal Parc Naziunal è avert 320 dis l'onn, sco el scriva en la communicaziun.
Festa cun chant, da mangiar e Globi
La nov'exposiziun è vegnida festegiada ils 3 da zercladur 2023 cun ina gronda festa. Quella ha cuntegnì in cortegi cun scolaras e scolars e la societad da musica, in program per uffants, gastronomia ed in concert dal Cor viril dal Parc Naziunal. Quel ha preschentà per l'emprima giada il nov imni per il Parc Naziunal Svizzer. Ina visita ha era Globi fatg. El ha preschentà ses nov cudesch cun novas aventuras ch'el ha passentà en il Parc Naziunal.
