Tgi che va sin ils lais da l’Engiadin'Outa cun patins fa quai sin agen ristg. Mintga onn datti accidents nua che persunas crodan tras la vetta da glatsch en l’aua fraida, quai che po finir mortalmain. Era quest onn èn crudadas duas persunas en il lai da San Murezzan. Ellas han pudì vegnir salvadas.
Quest onn hai dà cundiziuns optimalas per lais cun glatsch nair, temperaturas bassas e nagina naiv durant il temp ch'ils lais èn schelads. Il glatsch nair ha attratg fitg blers sportists sin ils lais.
Dapi 25 onns datti la cumissiun da lais en Engiadin'Ota. Quai è ina cumissiun che cusseglia las tschintg vischnancas Schlarigna, San Murezzan, Silvaplauna, Segl e Malögia en connex cun la segirtad sin ils lais. Sco ch'il president da la cumissiun, Cristiano Luminati, raquinta envers RTR n'aveva la cumissiun betg adina simpel da persvader tschertas vischnancas cura avrir u cura serrar loipas u sendas sin ils lais. Oz saja quai bler pli simpel.
Ils lais cun glatsch nair na vegnan dentant mai dads libers uffizialmain da las vischnancas. L’access na saja era mai scumandà. Mintgin giaja sin agen ristg sin il glatsch, sin atgna responsabladad – declera Cristiano Luminati. Quai saja da congualar cun la situaziun d’ir sin turas cun ils skis. Sin pistas marcadas saja la regiun da skis responsabla per la segirezza, dador la pista il skiunz sez. Sche ina vischnanca prepara ina loipa u ina plazza per giugar hockey u organisescha in event sco il White Turf a San Murezzan, lura surpiglia la vischnanca la responsabladad sin il glatsch, dador las marcaziuns è mintgin sez responsabel per sia segirezza.
Tenor Cristiano Luminati saja quai era giuridicamain la via la pli segira per las vischnancas. Sch'ina vischnanca dess liber il glatsch per ir cun patins ed i capitass in accident mortal pudessi dar che la vischnanca avess da surpigliar la responsabladad e purtar las consequenzas.