Tar lavurs da sanaziun tar il mir da serra Punt dal Gall tranter Zernez e Livigno l’onn 2016, è culà PCB en il flum dal Spöl che sa chatta en il Parc Naziunal Svizzer. Las Ovras Electricas d’Engiadina SA che possedan il mir da serra han annunzià immediat l’incap e sanà ils prims 60 meters dal batschigl da Tos. Per il Parc Naziunal Svizzer n’era quai però betg avunda. Tenor il directur, Ruedi Haller, vegn en dumonda be ina soluziun, numnadamain haja da vegnir sanà tut il traject da var 5,7 kilometers dal flum per allontanar cumplettamain il PCB.
Differents recurs pendents
Il chantun aveva relaschà l’ordinaziun d’ina sanaziun parziala da var trais dals total 5.7 kilometers. Cunter quella ordinaziun aveva il Parc Naziunal Svizzer fatg recurs. In auter punct che tira a la lunga la sanaziun e l’allontanaziun dal tissi ord il flum è la dumonda tgi che ha da surpigliar ils custs. Las Ovras Electricas d’Engiadina n’èn numnadamain betg prontas da finanziar la sanaziun.
Squitsch da temp è conscient a tuts
Tut las partidas èn da l’avis che la sanaziun fetschia prescha. Perquai vulan il Parc Naziunal Svizzer e las Ovras Electricas d’Engiadina analisar ils proxims mais ensemen la situaziun, uschia ch’i pudess dar ina soluziun extragiudiziala, ha ditg Ruedi Haller ad RTR. La finamira saja d’avair sin maisa ina soluziun concreta en in onn.