Il zercladur dal 2023 ha il Tribunal federal decidì che la pendiculara Signal a San Murezzan na possia betg vegnir remplazzada. La telecabina moderna era atgnamain gia vegnida approvada da l’uffizi da traffic. Questa decisiun è dentant vegnida tratga vinavant enfin a Losanna. Suenter otg onns planisaziun e custs da bun 5,5 milliuns francs, na vulan ils responsabels però tuttina betg capitular.
La procedura d’approvaziun dal plan per ina nova pendiculara vul la Engiadina San Murezzan Mountains SA inoltrar quest atun, sco ch’il president dal cussegl administrativ Marcel Bührer ha declerà a la radunanza generala da la societad.
Per l’access en la regiun Corviglia na datti naginas autras alternativas auter che la pendiculara Signal. Quella garantescha il transport da 30% da tut ils giasts.
Per garantir la gestiun da la pendiculara ulteriurs set fin otg onns, haja la societad d’investir questa primavaira stgars dus milliuns francs. Per remplazzar l’implant, vegnia anc ina giada inoltrà pli u main il medem project. Il Tribunal federal haja numnadamain surtut crititgà decisiuns da differents uffizis ch’avevan dà glisch verda a la societad per il project «Signal».
Ulteriurs impediments e retards
Suenter l’inoltraziun da la procedura che vegnia a cuzzar 18 mais, saja da far quint – en il meglier cas – la primavaira 2026 cun il cumenzament dal temp da construcziun da dus onns. Cunquai che ulteriurs recurs sajan fitg probabels, e vegnian a retardar il project per ulteriurs trais fin quatter onns, saja in’inauguraziun da la nova pendiculara realistica per la stagiun d’enviern 2031/32.
Rendaquint 2022/23
La radunanza generala da las Pendicularas Engiadina San Murezzan Mountains SA ha approvà il quint annual 2022/23 che serra cun in gudogn da 38’000 francs. Sper las investiziuns planisadas da bun 30 milliuns per la nova pendiculara Signal, è previs da realisar in ulteriur lai d’accumulaziun natiral, il «Lej Nair Pitschen». In’investiziun da radund 14 milliuns francs. Cun l’aua da naiv che vegn ramassada en ils dus lais, vegnia la societad ad ennavar tut la regiun da skis senza pli stuair pumpar si aua da funs.
