L’onn 1972 è la pendiculara Signal a San Murezzan ida en funcziun. Ils ultims passa otg onns han ils responsabels da la Engiadina San Murezzan Mountains SA lavurà vi d'in project per remplazzar la pendiculara ch’è vegnida en ils onns. La planisaziun ha custà var 5 milliuns francs, plirs recurs da vischinas e vischins da la pendiculara han retardà adina puspè la realisaziun.
Suenter che tut quels recurs eran vegnids refusads ed il permiss da construcziun era sin maisa ha il Tribunal federal evità la construcziun d’ina pendiculara da cabinas moderna. Numnadamain hai dà ina sentenzia cunter ils plans pervia d’ina lescha davart la runcada dal guaud.
Cumenzar tar nulla
Per ils responsabels dal territori da skis Corviglia/Marguns signifitga quai che las planisaziuns cumenzan puspè da nov. Per il directur Markus Meili ina situaziun difficila. Numnadamain na hajan els betg mo investì bler temp e raps, mabain avessan er il permiss da construcziun gia sin maisa.
Dar si na vegn però betg en dumonda. Fin l’atun da l’auter onn veglian ins numnadamain avair fatg tut ils scleriments per inoltrar ina nova approvaziun d’in plan. Restar optimistic, di Markus Meili, che na fa betg quint avant l’onn 2032 cun ina nova pendiculara Signal.
