Siglir tar il cuntegn

Header

cuntegn

Pervi dal coronavirus Intensivar las controllas al cunfin

Er ils cunfinaris ch'han il permiss da vegnir a lavurar en il Grischun ston respectar las reglas decretadas causa il coronavirus. La situaziun sa preschentia dentant savens auter, uschia il deputà jauer Rico Lamprecht envers la FMR.

Empè da viagiar sco permiss sur cunfin sulet u en dus en in auto, circuleschian anc adina busins cun plirs passagiers.
Autur: Rico Lamprechtpresident communal Val Müstair

Quest agir saja cuntraproductiv e na respectia era betg las prescripziuns federalas per evitar la derasaziun dal coronavirus. Perquai pretenda il comité d’intensivar las controllas al cunfin.

Comité per segirezza en Grischun dal Sid

Avant bundant dus onns existiva a Berna l’intenziun da diminuir il persunal al cunfin e da centralisar tut ils process da duana. Quai ha alarmà ils deputads ladins, sco p.ex. Mario Salis (San Murezzan), Rico Lamprecht (Val Müstair), Alessandro Della Vedova (Valposchiavo) e Maurizio Michael (Val Bregaglia) Els han fundà il Comitè per segirezza en il Grischun dal Sid e s’engaschan dapi là per avunda persunal, guardias da cunfin, als cunfins al sid dal Grischun. Dacurt ha communitgà il comité ch’ils commembers sa fetschian quitads.

Serrada da cunfin fiss fatala

En tut las regiuns da cunfin signifitgass ina serrada in grond manco da persunal. Uschia vegnia per exempel var dus terzs dal persunal dal Center da sanadad d’Engiadina Bassa cun l’ospital e la dimora d’attempads dal Tirol en la regiun, accentuescha il president communal da Scuol, Christian Fanzun.

Els duessan surprender responsabladad e sa cuntegnair sco prescrit per evitar ch'il coronavirus sa derasa.
Autur: Christian Fanzunpresident communal Scuol

La medema situaziun è er en las valladas talianas u la Val Müstair. Perquai saja impurtant ch’ils cunfinaris sa tegnian vid las prescripziuns.

Per tadlar curt e concis:

RTR novitads 12:00

Artitgels legids il pli savens

Ir a sanester Ir a dretg