La midada dal clima è palpabla enfin si en ils auts. Er sin il Piz Nair sur San Murezzan, sin passa 3'000 meters sur mar han ins constatà che la schelira permanenta lieua e pudess periclitar l'infrastructura. La schelira permanenta en la muntogna saja tar stgars 0 C°, di Lukas Arenson, inschigner per geotecnica e schelira permanenta. Perquai dovria bler per mantegnair la stabilitad dal grip.
Sfradentar sulet 2 fin 3 grads ha ina influenza extrema sin la stabilitad dal grip.
La finamira fiss da dumagnar la temperatura sin radund -2 u -3 C°, quai faschess gia ina enorma differenza, di Lukas Arenson.
Dretg mument d’intervegnir
Tenor ils responsabels da las pendicularas Engiadina San Murezzan Mountains na saja la situaziun anc betg acuta, ma i saja uss il mument d'intervegnir. La gestiun fa quai cun in project unic en Europa.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Project unic en l'Europa
En tut la muntogna vegnan furadas foras da var 45 meters en il terren sut l'infrastructura ed installads bischens en quellas foras. Quels vegnan emplenids cun dioxid carbonic cumprimì. D'enviern, cura che il terren è pli chaud che l'aria, sa stgauda il CO₂ e svapurescha sco gas. En in condensatur sa sfradenta quel e cula enavos en il terren. Uschia sa lascha sfradar il terren e la schelira permanenta. Il sistem da termosifon è enconuschent dapi decennis en l'Alaska u il Canada. En Europa è quest sistem dentant anc unic.
Custs da 1,8 milliuns francs
L'entir project custa var 1,8 milliuns francs. Las pendicularas Engiadina San Murezzan Mountains investeschan quels daners, senza avair la garanzia ch'i gartegia propi. Tenor Thomas Brunner, il manader tecnic da las pendicularas, rendia questa investiziun però, cunquai ch'ils custs per reconstruir l'entir stabiliment fissan bler pli auts.