Siglir tar il cuntegn
Inhalt

Engiadina Plantas sragischadas er si Muottas Muragl

Sin il Pass da l'Alvra han ils vents burascus fatg cupitgar pitgas d'auta tensiun e buffà davent parts dal tetg da l'ospizi e da la tegia d'alp. Er en il territori da skis da las pendicularas Engiadin'Ota ha il stemprà chaschunà donns ma era en il Puschlav èn ils donns però enorms.

En la regiun tranter Le Prese fin Poschiavo ha il stemprà derschì radund in hectara guaud. Quai rapporta la Südostschweiz sa referind sin l'inschignier forestal da la regiun. Tar il guaud sa tracti er da guaud da protecziun. Ussa saja d'examinar sche la protecziun saja anc garantida.

Muottas Muragl – Sragischà var 100 plantas

Sco ch’il commember da direcziun da la Engadin Mountains SA, Adrian Jordan ha confermà ad RTR, hajan ils ferms vents sragischà radund 100 plantas sin la muntogna. Quai surtut en vischinanza dal trassé da la funiculara da Muottas Muragl e lung la via che vegn duvrada l’enviern per ir cun la scarsola. Quella via avev’ins gia preparà per l’enviern e montà las paraids da segirtad. Er quellas sajan suenter ils ferms vents sin la muntogna per terra.

Cumenzà da far urden

Entant sajan ils uffizis forestals gia vid far urden ed allontanar – per part cun agid da helicopters – la bostga ch'è per terra. Sch’insatge da l’implant da la funivia avess dad esser vegnì donnegià da las plantas crudadas, na poss'ins betg anc dir, uschia Adrian Jordan. Dentant na fetschia el betg quint cun grondas surpraisas. Quant ch’il donn si Muottas Muragl custa finalmain ha las pendicularas, poss ins pir dir en in pèr dis.

Gronds donns suenter stemprà a La Punt

Er èn auters lieus ha il stemprà Vaia laschà enavos ses fastizs. Ils vents burascus han fatg cupitgar quatter pitgas da la lingia d'auta tensiun che maina sur il Pass da l'Alvra en Engiadina. Quai communitgescha Swissgrid. Las lingas da 380kV Filisur-Robbia sco er Pradella-Robbia/Segl sajan ord funcziun. Il provediment d'electricitad saja dentant garantì. Actualmain na dettia naginas interrupziuns dal current electric.

Dapi la dumengia saira sajan en l'entira Svizra sis lingias en il territori alpin pertutgadas dal stemprà. Il mument vegn anc calculà quant grond ch'ils donns èn.

Stratg davent tetg da l'ospiz sin l'Alvra

Il sgol da recognosziun da la Swissgrid ha er anc mussà tut in auter maletg: La malaura haja er stratg davent ina part dal tetg da l'ospiz e dal stabiliment da l'alp gist en vischinanza. Quai ha confermà Urs Niederegger, il chanzlist da La Punt, sin dumonda da RTR.

Il donn è vegnì calculà cun radund 200'000 francs e saja gia annunzià a la segiranza. La vischnanca da La Punt è la possessura da l'ospiz.

Vents cupitgan 1'500 bostgs en il guaud da La Punt

La Punt n'è betg be pertutgà sin l'Alvra da donns tras ils vents burascus: En il «God Arvins» èn vegnids buffads enturn radund 1'500 bostgs, quai tenor il manader da la gruppa forestala da la Punt, Ralf Fluor.

Interrupziuns da la rait da forza electrica

Gia la notg passada han vents, naiv e malaura procurà per difficultads en il provediment electric dal Grischun dal Sid. Sco quai ch'il furnitur d’electricitad Repower communitgescha, sajan las equipas da pichet stadas tut la notg en acziun:

  • Il glindesdi saira las 19:40 sajan stadas passa 1’080 chasadas a Brusio per curt senza electricitad, pervi che las lingias d’electricitad sajan stadas surdumandadas.
  • In’autra interrupziun ha pertutgà per 25 minutas fin a 2’800 chasadas en las fracziuns u vischnancas da Le Prese, Prada, Cologna, Li Curt, Poschiavo e San Carlo. La raschun da quest’interrupziun sajan stads bostgs e roma ch’ils vents ferms hajan buffà sin las lingias.
  • Suenter mesanotg èn lura stadas pertutgadas perfin 24’000 chasadas engiadinaisas – ellas sajan stadas per 10 minutas senza electricitad. Quai pervi che vents ferms avevan engrevgià la funcziun da la lingia d’electricitad dal Puschlav sur il Bernina en Engiadina.
  • Las 00:58 èn lura er anc ina giada radund 3’500 chasadas en la Valposchiavo stadas 13 minutas senza electricitad pervi dad in disturbi en la staziun da trafo a Campocologno.

RR novitads 11:00+

Ord l'archiv: Orcan Vivan en la Cadi – mars 1990