Il vicepresident da Segl, Claudio Dietrich, è il nov president da la plazza aviatica Samedan. La conferenza da la plazza aviatica ha elegì el cun 17 da 22 vuschs. Dietrich è gia dapi blers onns commember da la conferenza da presidents ed ha gudagnà il cumbat cunter Duri Joos, suprastant da la vischnanca da Samedan.
Ils represchentants da las 11 vischnancas purtadras da Segl fin a S-chanf han tschernì a chaschun da lur seduta Claudio Dietrich sco succesur da Christian Brantschen. Brantschen na po betg pli agir ina ulteriura perioda d'uffizi sco president da la conferenza, cunquai ch'el ha demissiunà sco president communal da Schlarigna.
Suenter l'elecziun dal nov president da la conferenza da la plazza aviatica ha RTR gì la chaschun da tematisar cun il nov-elegì Claudio Dietrich co i va vinavant cun l'entira modernisaziun da la platta aviatica Samedan.
RTR: Claudio Dietrich, pervi da tge raschuns avais Vus vulì daventar president?
Claudio Dietrich: Questa dumonda n'hai jau betg tschentà a mamez, sch'jau vi daventar president. Ma, la vischnanca da San Murezzan ha dumandà mai sch'jau avess interess. Cunquai ch'jau sun il commember ch'è il pli ditg part da la conferenza, hai jau pensà ch'i fiss ina buna idea da far quai.
Il post da president da la conferenza da la plazza aviatica è in impurtant. San Murezzan è la vischnanca che dat ils pli blers raps. Taidla Claudio Dietrich sin las vuschs da San Murezzan u essas Vus independent?
Jau ves mes pensum da guardar per il project, e betg per la vischnanca da San Murezzan. Jau crai che la suprastanza da San Murezzan enconuscha mai avunda bain per savair ch'jau hai mes agen avis e che quel n'è betg adina il medem sco quel da San Murezzan. Ma, per il project da la plazza aviatica è quai fitg impurtant che San Murezzan è da la partida. Pertge San Murezzan profita dapli dal project, ma paja era il pli bler a la plazza aviatica. Ella ha però er da surpigliar la responsabladad e da gidar da purtar enavant il project.
L'INFRA stat uss avant il grond project da bajegiar ina nova plazza aviatica. Co vulais vus gidar?
La votaziun che avaina gì l'avust (da l’onn passà) ha mussà, che nus avain il sustegn da la populaziun da l’Engiadin’Ota da cuntinuar. Uss èsi fitg impurtant da far vinavant cun il project, quai ensemen cun la cumissiun administrativa da la INFRA. Sche la conferenza po gidar, sto ella far quai.
Tge èn tenor Vus ils proxims pass?
Quai na vi jau anc betg dir. Jau stos ussa m'infurmar da tut ils temas. Jau vi anc discurrer cun Christian Brantschen (president partent), sco er cun Mario Cavigelli (president cumissiun administrativa) per vesair ils proxims pass sco er per vesair tge temas che ston vegnir purtads en la conferenza.
Vus avais gia ditg da l'entschatta che Vus na vulais betg per adina quest uffizi. Pertge?
Jau sun gia 14 onns en la suprastanza da Segl e n'hai anc betg decis sch'jau vi candidar anc ina giada.
L'onn proxim han lieu a Segl las elecziuns per la perioda d'uffizi 2027 fin 2029. Sche Claudio Dietrich sa decidida da betg anc candidar per ina ulteriura perioda d'uffizi en la suprastanza da Segl resta el be in onn president da la conferenza da la plazza aviatica.
Midaments era en il cussegl administrativ
Cun Markus Berweger e David Frei, en vegnids elegids gist dus novs da San Murezzan en il cussegl. Quai sin cust da Tina Boetsch da Zuoz, che n'ha betg pudì gudagnar avunda vuschs. Cun Berweger è vegnì elegì in candidat cun experientscha en il sectur da bajegiar. El è inschigner da construcziun a San Murezzan e deputà en il Cussegl Grond. E cun David Frei è vegnì tschernì il manager general da l'hotel La Margna a San Murezzan. El represchenta l’hotellaria en il gremi.
-
Bild 1 von 2. Markus Berweger, deputà dal Cussegl Grond e nov commember dal cussegl d'administraziun da la INFRA. Bildquelle: RTR.
-
Bild 2 von 2. David Frei, manager general da l'hotel Grace La Margna San Murezzan e nov commember dal cussegl d'administraziun da la INFRA. Bildquelle: RTR.