La collavuraziun tranter la cumissiun da gestiun e la conferenza da la plazza aviatica n'è mai propi stada buna. Sur onns n'hai dà quasi nagina collavuraziun fin che la cumissiun da gestiun ha intervegnì e pretendì ch'ella vegnia era resguardada.
Dapi lura parevi da funcziunar meglier. Ma uss han gist tut ils trais commembers da la cumissiun da gestiun da l'INFRA – l'organisaziun purtadra da l'eroport regiunal da Samedan – decidì da betg sa metter a disposiziun per la reelecziun ils 31 da december 2025. Tenor Urs Pfister, il president dal gremi da controlla, na sajan ses dus collegas ed el vinavant betg vegnids prendids serius da la conferenza da l'INFRA:
Igl è stupid da restar en la cumissiun sch'ins na vegn betg tadlà.
Christian Brantschen, il president da la conferenza da la plazza aviatica, n'ha betg vulì prender posiziun envers RTR davart la decisiun da l'entira cumissiun da gestiun da chalar. El ha dentant infurmà che tenor els haja la collavuraziun cun la cumissiun da gestiun funcziunà, e che la cumissiun haja survegnì tut las infurmaziuns ch'ella dovra per far la lavur.
Cler Gea da San Murezzan per la contribuziun speziala
Il suveran da la vischnanca da San Murezzan ha ditg Gea a la contribuziun speziala per la renovaziun da l'eroport regiunal a Samedan. Il resultat era cler cun 648 cunter 370 vuschs. La participaziun munta a 43,2%.
Cun il Gea da San Murezzan è fatg l’emprim pass per la finanziaziun dal project per la renovaziun da la plazza aviatica regiunala a Samedan. Il proxim pass suonda anc questa stad. En tut las 11 vischnancas – da Segl fin S-chanf – vegn vuschà ils 17 d’avust 2025 davart il project e sia finanziaziun.
La vischnanca da San Murezzan profita surproporziunalmain da l’eroport – per exempel pervia da giasts per ils hotels u possessurs da villas. Perquai duai San Murezzan er pajar ina contribuziun speziala da 5 milliuns a la renovaziun. Quai ha dà da discutar, cun quai che San Murezzan surpiglia tenor clav da scumpart insumma la pli gronda part dals custs per la renovaziun – numnadamain bunamain 40% dals custs. Plinavant èn adversaris da la cuntribuziun speziala da l'avis che San Murezzan haja – en relaziun cun l'import ch'i pajan – memia pauc da dir en chaussa. Ils aderents vesevan la contribuziun speziala sco cuntribuziun solidarica per la regiun. La maioritad dal suveran ha decis en favur da la contribuziun speziala.
Per tge vai?
Il project ch'è sin maisa per la renovaziun dal eroport a Samedan munta a 68 milliuns francs. 38 milliuns da quel import duain las vischnancas da la regiun Malögia – senza la vischnanca da Bregaglia – surpigliar. Ils raps vegnan pajads or sur sis onns fin l'onn 2031.
La vischnanca da San Murezzan duai tenor questa clav da partiziun surpigliar in pau dapli ch'in terz u radund 15 milliuns francs. Supplementarmain duai, tenor il concept da finanziaziun da la organisaziun purtadra dal eroport (INFRA), San Murezzan dar ina contribuziun speziala en furma d’in credit d’impegn da 5 milliuns francs. Tenor la missiva da l'INFRA profitia San Murezzan surproporziunalmain da l'eroport – e duai perquai pajar 5 milliuns francs dapli.