Il matg è normalmain in mais quiet sin la plazza aviatica a Samedan en Engiadin’Ota. Quest onn, durant ch’il WEF ha lieu a Tavau, pon ins observar dapli jets a Samedan. Il potenzial fiss però avant maun per anc dapli, sco Christian Gorfer, il schef da communicaziun e finanzas da l'Engadin Airport di. Causa la serrada dal pass dal Flüela, il transit direct da Samedan a Tavau, sa platgan ils aviuns cun ils giasts dal WEF pli gugent ad Altenrhein en il chantun Son Gagl ubain a Turitg. Uschia n’han els betg da viagiar sur in pass per arrivar a Tavau.
Creaziun da valur na resta betg en il Grischun
Tiers vegnia er anc ch’il shuttle cun il helicopter – cun in qual ch'ins fiss en var set minutas da Samedan a Tavau – n’è betg lubì durant la stad. La plazza aviatica a Samedan survegn perquai pliras desditgas d’aviuns annunziads. Cun sviar sin plazzas aviaticas ordaifer il Grischun giaja a perder la creaziun a valur en il Grischun, di Christian Gorfer. Tenor el èsi impurtant da chattar ina soluziun en cas ch’il WEF avess puspè ina giada d’avair lieu da primavaira empè dal schaner.