Per questa ediziun dal Forum mundial d'economia n'hai nagins mirs da naiv che blocceschan diversas vias enturn Tavau. Uschia ston quest onn vegnir installadas dapli saivs da segirezza ed vegnir observadas dapli vias, er sendas da viandar.
Er èsi vegnì decis da serrar il Pass dal Flüela. Da tegnair liber il pass e procurar il medem mument per la segirtad a Tavau fiss stà collià cun memia gronds sforzs, ha ditg il cumandant da la Polizia chantunala Walter Schlegel.
Per il WEF èn en acziun policistas e policists da l'entira Svizra, la cifra precisa na vegn dentant betg numnada. Tiers vegnan maximalmain 5'000 persunas da l'armada.
Dapli segirtad custa
Quest onn quintan ins cun custs supplementars da quatter milliuns francs per la segirezza al Forum mundial d'economia. Quels custs vegnan repartids tranter il chantun Grischun e la Confederaziun. Ils custs per l'armada muntan a maximalmain 32 milliuns francs, quai che correspunda al rom dal budget. Nov milliuns francs èn budgetads per la polizia. Quant auts ch'ils custs èn lura effectivamain, pon ins dentant pir dir cura ch'il WEF è a fin.
